Një nënvariant i llojit Omicron të koronavirusit është klasifikuar si një “variant me interes”, nga Organizata Botërore e Shëndetësisë, për shkak të “përhapjes së tij të shpejtë”.
JN.1 është gjetur në shumë vende të botës, duke përfshirë Indinë, Kinën dhe Shtetet e Bashkuara.
Rreziku për publikun është aktualisht i ulët dhe vaksinat aktuale vazhdojnë të ofrojnë mbrojtje, thotë OBSH por paralajmëron se Covid dhe infeksionet e tjera mund të rriten këtë dimër.
Viruset respiratore si gripi, virusi sincicial i frymëmarrjes (RSV) dhe pneumonia e fëmijërisë janë gjithashtu në rritje në hemisferën veriore.
Virusi që shkakton Covid po ndryshon vazhdimisht me kalimin e kohës dhe ndonjëherë kjo çon në zhvillimin e varianteve të reja ndërkohë që omicron ka qenë varianti dominues global për disa kohë.
Organizata Botërore e Shëndetësisë (OBSH) aktualisht po gjurmon një numër variantesh me interes të lidhura me Omicron, duke përfshirë JN.1 edhe pse asnjë prej tyre nuk konsiderohet të jetë shqetësues aq sa të merren masa.
JN.1 është aktualisht varianti me rritjen më të shpejtë në Shtetet e Bashkuara, sipas Qendrave të SHBA për Kontrollin dhe Parandalimin e Sëmundjeve, që përbën 15 deri në 29% të infeksioneve.
Agjencia e Sigurisë Shëndetësore në Britani ndërkohë raporton se JN.1 aktualisht përbën rreth 7% të testeve pozitive Covid të analizuara në një laborator dhe do të vazhdojë të monitorojë të gjitha të dhënat e disponueshme për këtë dhe variante të tjera.
JN.1 po përhapet me shpejtësi në të gjitha rajonet, ndoshta sepse ka një mutacion shtesë në proteinën e spikes në variantin BA.2.86 nga i cili ka ardhur.
“Parashikohet që ky variant mund të shkaktojë një rritje të rasteve të Sars-Cov-2 mes një rritje të infeksioneve të tjera virale dhe bakteriale, veçanërisht në vendet që hyjnë në sezonin e dimrit”, thuhet në vlerësimin e OBSH-së.
Ka ende prova të kufizuara se sa i aftë është JN.1 për të kapërcyer imunitetin e ofruar nga vaksinat dhe nuk ka raportime të njerëzve që sëmuren më shumë me këtë variant sesa ato të mëparshmet.
Por nevojiten më shumë studime, thotë OBSH, pasi numri i vendeve që raportojnë të dhëna për njerëzit e shtruar në spital me Covid është zvogëluar në mënyrë dramatike.
Burimi: BBC. Përshtati: Gazeta Si.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
