Nga Gazeta ‘SI’ – Të premten e 21 korrikut, monedha euro këmbehej me rreth 100 lekë, niveli më i ulët ndonjëherë i valutës europiane në atë që njihet si ‘niveli i paritetit’.
Zhvlerësimi i euros kundrejt monedhës shqiptare ka qenë i shpejtë dhe i vazhdueshëm, me zanafillë në muajt e parë të këtij viti, por java e fundit do të mbahet mend.
Në pesë ditë euro është zhvlerësuar pothuajse 1 pikë në ditë kundrejt lekut (shih grafikun), duke tërhequr nga pas të gjitha monedhat e tjera të huaja, përshkak të lidhjes së tyre me monedhën europiane.
Gjithsesi, euro rikuperoi lehtë humbjet, duke u rritur në 100.9 lekë nga 100.4 që ishte një ditë më parë. E hëna e 24 korrikut do të na tregojë nëse tendenca rritëse do të vijojë apo shpresat do të shuhen, për ta çuar euron poshtë lekut.
Ekspertët e ekonomisë, por edhe vetë operatorët e tregut presin zhvlerësim të vazhdueshëm të monedhës të paktën deri në vjeshtë, ndikuar nga turistët dhe volumet e pritshme të euros në vend.
Eksportuesit dhe të punësuarit që paguhen në valutë, janë të parët që kanë ndjerë luhatjen, por efekti po zgjerohet gjithnjë e më shumë në një ekonomi tërësisht të ekspozuar ndaj euros.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
