Gazeta Si – Barcelona ka humbur për të tretën herë radhazi në ‘Camp Nou’. Këtë herë në stadiumin mitik ka festuar edhe një shqiptar, Ivan Balliu, mbrojtësi i Kombëtares që fitoi 0-1 me Rajo Valekanon ndaj katalanasve.
Garsia shënoi golin e fitores vetëm pas 7 minutash lojë në këtë ndeshje, ku Barcelona u ndal nga shtylla në dy raste, pas gjuajtjeve të Zhordi Albës dhe Gavit. Kjo humbje e Barcelonës ka bërë që Real Madridit t’i duhet vetëm një pikë për të siguruar matematikisht titullin kampion në La Liga. Një titull, që mund ta fitojë në ndeshjen e radhës me Espanjolin e Keidi Bares.
Ivan Balliu luajti 90 minuta në “Camp Nou” dhe bëri paraqitjen e tij të zakonshme. Mbrojtësi i krahut të djathtë u ndëshkua me karton të verdhë. Ndeshja u tensionua shumë në fundin e saj, ku vetëm në shtesë u dhanë 5 kartonë të verdhë.
Fundjava ishte e veçantë ndërkohë për tre kuqezinjtë e Empolit, që mundi me përmbysje Napolin. Vetëm Asllani e nisi titullar dhe u zëvendësua në pjesën e dytë për shkak dëmtimi. Nedim Bajrami u fut nga stoli dhe la shenjën e tij me një asist të jashtëzakonshëm për golin e 3-të Empolit. Adrian Ismajli nuk luajti në këtë ndeshje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
