.png)
Gazeta Si – SPAK ka marrë në administrim telefonin e gjetur brenda qelisë së burgut të Drenovës, që dyshohet se përdorej nga i dënuari me burgim të përjetshëm, Laert Haxhiu. Ky aparat tashmë është çuar në laboratorin e hetuesve specialë, ku po punohet mbi hapjen e tij.
Deri më tani një grup hetuesish kanë në dorë një provë të fortë, pasi ka dyshime se Haxhiu ka pasur komunikime me njerëz të botës së krimit, duke vijuar aktivitetin e tij kriminal edhe brenda qelisë.
Në të tilla kushte për Laert Haxhiun mund të kërkohet një regjim i posaçëm “41 biss”. Pak ditë më parë, një kontroll i befasishëm i kryer nga Policia e Burgjeve në qelitë e burgut të sigurisë së Lartë në Drenovë të Korçës, ka çuar në zbulimin e një aparati telefoni, që përdorej për thirrje telefonike nga Laert Haxhiu.
Haxhiu, kishte disa kohë që ishte transferuar nga ambjentet e burgut Nr.313 në Tiranë në drejt Drenovës, aty ku vuajnë dënimin me burg përjetë dhe dy bashkëpunëtorët më të ngushtë të tij, Anterio Kaloshi dhe Orgest Bilbili.
Sipas burimeve, Haxhiu është përgjuar teksa fliste me persona të tjerë jashtë burgut, ndaj kontrolli në orët e mesnatës është kryer posaçërisht në qelinë e tij.
Ai është dënuar me burgim të përjetshëm si organizator për atë që njihet si masakra e Lushnjës në vitin 2017, ku mbetën të vrarë Zamir Latifi, mik i nipit të Aldo Bares, dhe Jurgen Hoxha.
Ndërkohë pronari i lokalit ku ndodhi ngjarja dhe një kalimtar mbetën të plagosur aksidentalisht.
Aktualisht, Haxhiu po gjykohet në Gjykatën e Posaçme për të paktën 17 ngjarje kriminale, mes të cilave vrasje e atentate, shpërthime me tritol e grabitje me dhunë. Zbërthimi i bandës së tij erdhi përmes dëshmisë së bashkëpunëtorit të drejtësisë Artan Tafani.
Laert Haxhiu, u ekstradua më 3 korrik të vitit të kaluar nga Greqia një vit pasi ishte arrestuar në Janinë të Greqisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
