.png)
Spanjë-Zvicër dhe Itali-Belgjikë janë dy çerekfinalet e para të Euro 2020. Ato luhen nesër dhe kuptohet që e gjithë vëmendja është te sfida e Mynihut (ora 21:00) mes italianëve dhe belgëve. Trajneri Mançini ka vetëm një dyshim, që ka të bëjë me aktivizimin ose jo të Kielinit në qendër të mbrojtjes.
Kapiteni i “axurrëve” është rikuperuar, por ka sërish dyshime pas atij dëmtimi ndaj Zvicrës. Ndoshta është e kotë të sakrifikohet në këtë moment. Gjithçka varet nga vendimi i vetë futbollistit, por gjasat janë që Italia të luajë sërish me dyshen Bonuçi-Açerbi. Edhe në ndeshje kontrolli u provua lojtari i Lacios.
Në sulm, Mançini pritet t’i besojë një fanellë titullari Kiezës, protagonistit të fitores ndaj Austrisë me atë gol të shënuar në shtesë. Mund të jetë juventini “karta” e Mançinit në formacion, në mënyrë që të tentohet të çahet sa më shpejt muri belg në të djathtë. Për momentin, Kieza është në avantazh ndaj Berardit për të formuar treshen e sulmit, bashkë me Imobilen dhe Insinjen. Pjesa tjetër e skuadrës nuk ndryshon, në mesfushë do të jetë treshja Barela-Zhorzhinjo-Verrati.
Në radhët e Belgjikës situata është e kushtëzuar nga dëmtimet e De Bryjne dhe Eden Hazard, të cilët nuk janë stërvitur me grupin ditët e fundit. De Bryjne, sipas informacioneve të shtypit belg, pritet të luajë me një injeksion, pasi është shumë i rëndësishëm për skuadrën e trajnerit Roberto Martinez. Eden Hazard mund të jetë në stol dhe vendin e tij do ta marrë Karrasko. Mbrojtja belge sërish do të jetë me tre lojtarë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
