.png)
Gazeta Si - Një shqiptar është vrarë në Itali mbrëmjen e të enjtes pas një konflikti me fqinjin e tij në fshatin San Polo të Arezzos.
Sipas mediave italiane, viktima është 57 vjeç me origjinë nga Shqipëria, por identiteti i tij nuk është bërë i ditur. Ai u qëllua me pushkë nga fqinji i tij 53-vjeçar.
Sa i përket rrethanave të ngjarjes, shqiptari dëmtoi me ekskavator 4 makina të parkuara të fqinjit të tij e më pas goditi disa herë me kovën e ekskavatorit muret dhe çatinë e shtëpisë, duke i shkaktuar dëme të konsiderueshme komshiut të tij.
Ky i fundit, në rrethana të tilla, mori pushkën dhe qëlloi disa herë në drejtim të 57-vjeçarit shqiptar duke e lënë të vdekur.
Autori i ngjarjes është arrestuar nga policia italiane. Ende nuk dihen shkaqet e konfliktit mes palëve, që detyruan shqiptarin në gjaknxehtësi e sipër të shkatërronte me ekskavatorin në pronësi të tij, mjetet dhe shtëpinë e komshiut.
Banesa e fqinjit, e dëmtuar me ekskavator, është konsideruar e pabanueshme dhe familjarët janë larguar nga shtëpia.
Mediat italiane raportojnë se ekziston një hipotezë e mbrojtjes legjitime ose tejkalimit të mbrojtjes legjitime që mund të zvogëlojë përgjegjësitë e vrasësit.
Megjithatë, është ende herët për të kuptuar nëse vrasësi është ndjerë vërtet i kërcënuar, në jetën e tij dhe të familjes, nga viktima që po përparonte me buldozer.
Një histori që ka tronditur qetësinë e fshatit Arezzo në ditën e Ujit të Bekuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
