.png)
Ish-ushtarakët, të cilët rezultojnë debitorë ndaj Fondit të Sigurimeve Shoqërore të krijuara si diferencë nga rishqyrtimi i pensioneve të parakohshme për vjetërsi shërbimi, do të falen.
Projektligji është propozuar nga nga kreu i kuvendit, Gramoz Ruçi. Nga ky projektligj përfitojnë 847 ish-ushtarakë.
Shuma e krijuar nga debitorët kap vlerën e 110.7 milionë lekëve, por nuk ka një faturë financiare dhe nuk i rëndon arkës së shtetit.
Projektligji i diskutuar në Komisionin për Ekonominë dhe Financat ka patur debate në radhët e përfaqësuesëve të shoqatave të ushtarakëve.
Sipas tyre ky projektligj nuk i shteron problematikat që kanë ushtarakët.
Sipas përfaqësuesëve të ushtarakëve në komision janë mbi 8,8 mld lekë ose mbi 69 mln euro dëm financiar që u është shkaktuar atyre nga ndryshimet e herëpasherëshme të ligjit për pensionet e parakohëshme.
“Qeveria të nxjerr akt normativ në fuqinë e ligjit organik për zbatimin nen për nen të statustit të ushtarakut duke marrë parasysh propozimet e shoqatës. Kjo senacë nuk i zgjidh këto gjëra. Koka e projektligjit nuk shkon me përmbajtjen- nëse ne këtu kemi ardhur për të falur detyrimet nga gjyqësori, nuk kemi bërë asgjë, janë 8 mijë ushtarakë që nuk kemi vendim gjyqësor të formës së prerë. 1 mln e 300 mijë e deri tani kam paguar, 500 mijë që mi mbajnë çdo muaj dhe nuk kam vendim gjyqësor.”- u shpreh një prej përfaqësuesëve të shoqatës në komision.
Shoqatat propozuan ndryshim të ligjit për këtë qëllim.
Astrit Kuko nga Ministria e Financave u shpreh se nuk janë financat ideuese të projektligjit, ministria thjesht ka dhënë mendim. “360 mln lekë në 2016-ën ka qenë fatura e faljes së ish-ushtarakëve. Përfundimisht ligji është i miratuar. Kërkesat janë trajtuar edhe herët e tjera. Është zbatim i ligjit të 2009. Ministria e Financave dakordësohet me projektligjin që po shqyrtohet”- u shpreh Kuko.
Shef i Kabinetit të Kryetarit të Kuvendit, Kosta Bajraba tha se ky projektligj është një hap drejt zgjidhjes shteruese të çështjes së pensioneve të parakohshme të ushtarakëve të Shqipërisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
