.png)
Gazeta Si - Gjykata e Elbasanit vendosi të shtyjë për në datën 11 nëntor seancën, ku nga një grup ekspertësh do të shqyrtohet kërkesa e ish-kryebashkiakut të Kukësit, Safet Gjicit për lirimin nga qelia për arsye shëndetësore.
Avokatët, në kërkesën e tyre janë bazuar në nenin 59/a pika c e Kodit Penal, sipas të cilit, për dënime të mbetura nën dy vite, mund të lejohet qëndrimi në shtëpi për shkaqe shëndetësore.
Avokati i zgjedhur prej tij, Markeljan Jançe, ka theksuar Gjici se ndodhet në gjendje të rënduar spitalore dhe kërkon qëndrim në shtëpi.
Sipas tij, gjendja shëndetësore e Gjicit është rënduar dhe në IEVP Lushnjë, ai nuk ka kushte mjekimi dhe i rrezikohet jeta. Avokati ka pohuar se klienti i tij ka zgjerim të aortës dhe disa probleme të tjera të rënda shëndetësore.
Po ashtu, në sallë është paraqitur edhe raporti mjekësor mbi gjendjen e Gjicit dhe vendodhja e tij, kërkesë kjo e kryetares së seancës gjyqësore.
Gjyqtarja e çështjes, Suela Lika kërkoi që të gjitha provat e paraqitura nga avokati t’i nënshtrohen vërtetësisë. Gjithashtu gjyqtarja Lika kërkoi të sillen të gjitha kartelat mjekësore të Gjicit që nga koha e paraburgimit.
Aktualisht Gjici ndodhet në regjim spitalor nën kujdesin e punonjësve të IEVP Durrës, ndërkohë që qëndron në burgun e Lushnjës.
Sipas avokatit, Gjici ka vuajtur 1.9 vite burg dhe i kanë mbetur 1.2 vite. I akuzuar për shpërdorim detyre pas skandalit seksual në zyrën e tij, Gjici u dënua me 3 vite burg në shkurt 2024, ndërsa Apeli i GJKKO-së ashpërsoi dënimin në qershor të këtij viti, duke i dhënë përfundimisht 4 vite e 6 muaj burg.
Por për shkak të gjykimit të shkurtuar, Gjici duhet të vuajë përfundimisht 3 vjet burg me vendim të formës së prerë, tashmë jo për akuzën e "shpërdorimit të detyrës", por për atë të "korrupsionit pasiv".
Avokatët në kërkesën e tyre janë bazuar në nenin 59/a pika c e Kodit Penal sipas të cilit, për dënime të mbetura nën dy vite mund të lejohet qëndrimi në shtëpi për shkaqe shëndetësore.
Me ndryshimin e akuzës ndaj Gjicit, rrjedhimisht ndryshoi edhe akuza ndaj Alma Kaçit, e cila gjithashtu u gjejt fajtore nga Apeli për korrupsion dhe u dënua me 1 vit burg për akuzën e "prostitucionit aktiv".
Safet Gjici, ish-kryebashkiak i Kukësit u arrestua 1 vit më parë pas publikimit në rrjete sociale të një video seksuale mes tij dhe Alma Kaçit në zyrë.
Në videon e plotë, dëgjohej edhe një bisedë ku kjo e fundit i kërkonte atij financim për një projekt që rehabilitonte qentë e rrugës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
