.png)
Gazeta Si – Ish-zëvendëspresidentja e Parlamentit Evropian, Eva Kaili, e përfshirë në hetimin belg për çështjen “Katargate”, ka paditur të njëjtin Parlament “për shkelje të imunitetit të saj parlamentar, pasi ishte monitoruar nga shërbimet sekrete gjatë periudhës në të cilën ajo mori pjesë në Komisioni “Pega”.
Ky i fundit po hetonte institucionalisht ekzistencën e softuerit të paligjshëm që monitoronte aktivitetet e eurodeputetëve dhe qytetarëve të BE-së.
Lajmi është bërë i ditur nga avokatët e eurodeputetes greke. E arrestuar më 9 dhjetorin e kaluar, Kaili u lirua më 25 maj me kushte pas një paraburgimi parandalues prej më shumë se pesë muajsh.
44-vjeçarja u akuzua për pjesëmarrje në një organizatë kriminale, korrupsion dhe pastrim parash. Arrestimi i saj shkaktoi valë reagimesh në të gjithë Brukselin dhe nxori në dritë një hetim mbi një skemë parash për favore që përfshinte shuma të mëdha dhe dhurata që dyshohet se janë paguar nga Katari dhe për të ndikuar në politikën e Parlamentit Evropian.
Eurodeputetja u arrestua si pjesë e hetimit të “Katargate”, ku pranoi para hetuesve se kishte udhëzuar të atin që të fshihte valixhet me para.
Menjëherë pas arrestimit, autoriteti grek ngriu të gjitha pasuritë që i përkisnin asaj dhe familjes.
Sipas tyre, llogaritë mbaheshin në një bankë në Panama dhe i përkisnin Kailit, babait të saj Alexandros Kailis dhe nënës së saj.
Ata pretendojnë se llogaritë përmbajnë 20 milionë Euro të mbledhura përmes dy depozitave nga Katari në Kaili.
Avokati i eurodeputetes edhe më herët ka deklaruar se dokumentet janë false dhe se ai u ka kërkuar autoriteteve greke të kërkonin ndihmë nga Panamaja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
