.png)
Gazeta Si - Ish-deputeti socialist Arben Çuko është paraqitur këtë të hënë në ambientet e Prokurorisë së Posaçme lidhur me dosjen "21 Janari".
I pyetur nga prokurorët specialë, Çuko ka dhënë shpjegime për ngjarjet e ndodhura gjatë protestës para kryeministrisë të organizuar nga PS-ja në atë kohë në opozitë, që përfundoi me vrasjen e 4 protestuesve në bulevard.
Në përfundim të seancës, Çuko sqaroi se ai ishte thirrur në cilësinë e personit që ka dijeni për ngjarjen.
“Në cilësinë e atij që ka pasur dijeni. Janë vrarë 4 veta ju e dini shumë mirë. Janë 4 veta të vrarë në Bulevard që nuk mund të lihen kaq kollaj në harresë”, tha Çuko për mediat.
Pak ditë më parë për çështjen e "21 janarit" u paraqit në SPAK edhe ish-ministri i Brendshëm, Saimir Tahiri, i cili u pyet si person në dijeni për rrethanat e protestës.
Javën e shkuar për këtë çështje, u thirr edhe deputeti i PS, Xhemal Qefalia, ndërsa para tij kanë dëshmuar në SPAK ish-komandanti i Gardës, Ndrea Prendi, ish-kreu i Policisë së Shtetit Hysni Burgaj dhe ish-zëvendësi i tij, Agron Kuliçaj.
SPAK ka nisur veprimet hetimore në lidhje me këtë çështje pasi Gjykata e Lartë i vendosi kompetencën. Një nga detyrat që i ka lënë gjykata është të pyesë të gjithë organizatorët e kësaj proteste si dhe gjithë zyrtarët që kanë pasur detyrë menaxhimin e protestës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
