.png)
Konferenca e 27-të e Shefave të Shtabit të Përgjithshëm të Iniciativës SHBA–Karta e Adriatikut (A-5), çeli të mërkurën punimet e saj në Tiranë. Kjo konferencë po bashkëkryesohet nga shefi i Shtabit të Përgjithshëm të FARSH gjeneralmajor Arben Kingji. Fokusi i konferencës janë zhvillimet dhe dinamikat në mjedisin e sigurisë në rajon dhe më gjerë, rritja e shpenzimeve të Mbrojtjes mbi pragun 2% e Produktit të Brendshëm Bruto si një mënyrë për të përmbushur objektivat e kapaciteteve të Aleancës dhe objektivat e planifikimit dhe rishikimit të NATO-s për vendet partnere.
Pesë vendet nënshkruese të A-5; SHBA, Shqipëri, Bosnje-Herzegovinë, Kroaci, Mal i Zi dhe Maqedonia e Veriut ndërsa në statusin e vëzhguesit janë të pranishëm edhe përfaqësues nga Kosova dhe Sllovenia.
Shefi i Shtabit të Përgjithshëm të Forcave të Armatosura, Arben Kingji, tha sot se “krijimi i kushteve për Kosovën për t’iu bashkuar iniciativës si një vend demokratik dhe me një orientim të palëkundur drejt integrimit euroatlantik, do të sillte një vlerë të shtuar jo vetëm për këtë iniciativë, por edhe në sigurinë dhe stabilitetin rajonal”.
Në fjalën e tij, në konferencën e 27-të e Shefave të Shtabit të Përgjithshëm të Iniciativës SHBA–Karta e Adriatikut (A-5), Kingji tha se “kompleksiteti i sotëm i sigurisë dhe në mënyrë të veçantë lufta e paprovokuar e Rusisë në Ukrainë ka ndikuar negativisht në zonën euroatlantike dhe në rajonin tonë, duke nxjerrë në pah rolin e pazëvendësueshëm të bashkëpunimit ushtarak”.
“Në kuadër të iniciativës SHBA-Karta e Adriatikut përgjatë historisë së saj ka treguar se pavarësisht divergjencave, bashkëpunimi dhe sot në sajë të politikave me dyer të hapura katër nga pesë vende të saj rreshtohen si aleatë në flamurin e NATO-s”, theksoi Kingji.
Kingji u shpreh se “misioni ynë në këtë iniciativë nuk përfundoi me anëtarësimin në NATO, që ishte një arritje madhore dhe në të njëjtën kohë përgjegjësi për të çuar më lart vlerën në të cilën është ndërtuar aleanca për të kontribuar për sigurinë, stabilitetin e rajonit dhe mbrojtjen kolektive në rast nevoje”.
“Përveç ofrimit të mbështetjes në procesin e anëtarësimit dhe zgjerimit të iniciativës së bashku morëm përsipër angazhimin për të kontribuar në misionin e NATO-s në Irak, eksperiencë e cila duhet zgjeruar me misione apo fusha të tjera. Bashkëpunimi dhe partneriteti rajonal përbëjnë fusha të rëndësishme të politikës së mbrojtjes”, nënvizoi Kingji.
Kingji u shpreh se “kjo iniciativë ofron një platformë bashkëpunimi, në të cilën shkëmbejmë mendime dhe bashkojmë përpjekje me interes për një të ardhme të sigurt dhe të qëndrueshme për rajonin dhe më gjerë”.
“Kam besim se shkëmbimi i ideve gjatë kësaj konference do të jenë produktive dhe një mundësi e mirë për thelluar partneritetin dhe zgjeruar marrëdhëniet ekzistuese dhe të të hartojmë një rrugë dhe një të ardhme më të sigurt për vendet dhe njerëzit tanë”, tha Kingji.
Presidenti Bajram Begaj dhe Ministri i Mbrojtjes Pirro Vengu, kërkuan që edhe Kosova të bëhet pjesë e kësaj nisme.
Si Begaj dhe Vengu u shprehën se kërcënimet në rajon janë gjithmonë prezente ndaj anëtarësimi i Kosovës do të sillte më shumë stabilitet në Ballkanin Perëndimor.
“Anëtarësimi i Kosovës në Kartën e Adriatikut është i një rëndësie të veçantë jo thjesht për sigurinë e Kosovës, por do i shërbente edhe më tej sigurisë së Rajonit”, u shpreh Begaj.
“Kosova e ka vendin në këtë tavolinë”, tha ministri i Mbrojtjes, Vengu.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
