Inflacioni i lartë në Suedi, fajin e ka Beyoncé

Inflacioni në Suedi ra poshtë nivelit 10% në muajin maj, por ishte përsëri më i lartë nga se ekspertët prisnin dhe shkaku ishte: Beyoncé.

Ekspertët thonë se koncertet e saj në Suedi rritën inflacionin atje.

Çmimet e konsumit u rritën me 9.7% në maj, nivel më i ulët se 10.5% në prill.

Ulja e çmimeve të energjisë elektrike dhe ushqimeve kontribuoi në uljen e normës së inflacionit në maj, ndërsa në të njëjtën kohë u rritën kostot e mallrave dhe shërbimeve të caktuara. “Për shembull, vizitat në hotele dhe restorante, shërbime rekreative dhe veshje”, tha agjencia e Statistikave në Suedi.

Sipas Michael Grahn, kryeekonomist për Suedinë në Danske Bank, një vizitë e Beyoncé në Stokholm mund të shpjegojë pse norma ishte më e lartë se sa pritej.

“Fillimi i turneut të saj botëror në Suedi duket se ka ndikuar në inflacionin e majit, se sa është e pasigurt”, tha Grahn në një postim në mediat sociale.

Grahn tha se koncerti i saj i shumëpërfolur në maj “ndoshta” përbënte 0.2 nga 0.3 pikë përqindjeje të shtuara në inflacion nga çmimet e hoteleve dhe restoranteve.

Dhjetëra mijëra fansa u dyndën në Stokholm në mes të majit për të parë dy koncertet që nisën turneun e saj të parë solo në shtatë vjet. Sipas vlerësimeve, turma në çdo koncert ishte 46.000, me disa të detyruar të qëndronin jashtë kryeqytetit ndërsa hotelet u mbushën.

U raportua se një numër fansash kishin udhëtuar nga jashtë për të parë shfaqjet, duke përfituar nga monedha e dobët suedeze dhe çmimet më të ulëta të biletave.

Grahn i tha Wall Street Journal se efekti ishte “shumë i rrallë” dhe ai priste që situata të kthehej në normalitet në qershor. Megjithatë, një ekonomist i tha Financial Times se Suedia mund të përjetojë një rritje të ngjashme të inflacionit kur Bruce Springsteen luan tre netë koncerte në Gothenburg qershor.

Inflacioni në Suedi arriti kulmin në dhjetor në 12.3% – një nivel më i lartë në më shumë se 30 vjet – më pas u ngadalësua pak në janar në 11.7%, por papritur u rrit përsëri në 12% në shkurt.

Ashtu si kolegët e saj në Shtetet e Bashkuara dhe Europë, banka qendrore e Suedisë ka rritur vazhdimisht normën e saj udhëzuese në një përpjekje për të frenuar inflacionin.

Riksbank e ngriti normën në 3.5% në fund të prillit dhe tha se “ndoshta” do ta rriste atë me një çerek pikë tjetër në qershor ose shtator./Theguardian

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.