.png)
Gazeta Si – GJKKO la në burg Loran Dushën, i cili u ekstradua dy ditë më parë nga Zimbabvet drejt Shqipërisë, pasi ishte shpallur në kërkim nga SPAK për korrupsion dhe pastrim parash në lidhje me hetimet për ndërtimin e inceneratorit të Fierit.
Dusha ka mbajtur postin e administratorit të inceneratorit të Fierit, ndërsa nuk ishte i pranishëm në seancën që u zhvillua paraditen e sotme. Kjo për arsye se ai është i shtruar në spitalin e burgut për shkak të problemeve shëndetësore.
Më 23 shtator të vitit 2023, GJKKO vendosi dënimin e tij me katër vite e tetë muaj burg si pasojë e gjykimit të shkurtuar për inceneratorin e Fierit.
Mirëpo, një vit më vonë, Gjykata e Posaçme e Apelit ktheu për rigjykim dosjen me një trupë tjetër gjykuese, duke prishur në këtë mënyrë vendimin e Shkallës së Parë.
Hetimet për inceneratorin e Fierit u mbyllën në dhjetor 2022. Sipas SPAK për inceneratorin e Fierit u paguan 4 milionë euro për punë që nuk u kryen asnjëherë, ndërsa 60 milionë Lekë është dëmi i shkaktuar në buxhetin e shtetit në skemën e mashtrimit.
Të gjithë të akuzuarit i mohuan akuzat e SPAK dhe kërkuan pafajësi në të dyja shkallët e gjyqësorit. Mes tyre edhe ish-ministri i Mjedisit, Lefter Koka.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
