I nxehtë ekstrem në Europë, zjarri djeg ishullin e Kretës. Në Spanjë 102 viktima

Gazeta Si – Vala ekstreme e të nxehtit vazhdon në gjysmën e Evropës: në Spanjë, mbi 100 vdekje janë regjistruar që nga e shtuna, dhe temperaturat në rajonin e Andaluzisë ende arrijnë 42 gradë.

Në Greqi, është dita e dytë e zjarreve në ishullin e Kretës, ku flakët po ndizen në komunën e Ierapetrës në juglindje të ishullit, në provincën e Lasithit.

Zjarri, i cili lëviz në varësi të drejtimit të erërave të forta që fryjnë në zonë, është “ndarë” në tre fronte, të përqendruara rreth Fermës, Akhlias dhe Schinokapsala.

Hotelet dhe shtëpitë janë evakuuar: qindra banorë dhe turistë janë transferuar duke ndjekur udhëzimet e autoriteteve. Shërbimet e urgjencës mjekësore janë në gatishmëri maksimale.

Disa banorë dhe turistë e kaluan natën në palestrën e mbuluar në Ierapetra, e cila u hap për të ofruar një strehë të sigurt.

Tetë ambulanca janë në funksion, të cilat deri më tani kanë transportuar tre persona me probleme të frymëmarrjes, dy me lëndime të lehta dhe një qytetar me probleme lëvizshmërie në spitalin e përgjithshëm në Ierapetra.

Sipas zjarrfikësve, një operacion i madh zjarrfikës është duke u zhvilluar me automjete tokësore dhe ajrore, ndërsa përforcime nga Athina kanë mbërritur gjithashtu në vendngjarje.

Forcat operacionale janë vazhdimisht në rritje, por operacioni për të shuar zjarrin mbetet i vështirë për shkak të erës së fortë dhe terrenit të ashpër në zonë.

Të paktën 102 persona kanë vdekur në valën e parë të nxehtësisë ekstreme të vitit që filloi të shtunën në Spanjë.

Kështu raportojnë autoritetet qendrore të vendit, ndërsa alarmi për nxehtësinë mbytëse vazhdon në 12 nga 17 rajonet e Spanjës me paralajmërime për temperatura ekstreme dhe stuhi shumë të forta në nivel lokal, raporton Agjencia Shtetërore Meteorologjike Amet në faqen e saj të internetit.

Në gjashtë muaj që nga fillimi i vitit, sistemi MoMo ka regjistruar të paktën 380 vdekje që i atribuohen temperaturave të larta në Spanjë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.