Kina po përjeton një rritje të infeksioneve të një virusi të frymëmarrjes, duke çuar në raportime për spitale të mbipopulluara, masa të reja monitorimi dhe shqetësime publike për një shpërthim.
Virusi, i identifikuar si metapneumovirus njerëzor (HMPV), është kthyer në një problem në provincat veriore të Kinës, veçanërisht tek fëmijët.
Përhapja vjen pesë vjet pasi bota u alarmua për herë të parë për shfaqjen e një koronavirusi të ri në Wuhan, Kinë, i cili më vonë u shndërrua në një pandemi globale me shtatë milionë vdekje të raportuara.
Fotot dhe videot e njerëzve të veshur me maska në spitalet në Kinë u shfaqën në platformat e mediave sociale dhe raportet lokale krahasuan skenat me shpërthimin fillestar të Covid.
Autoritetet shëndetësore po zbatojnë masa të reja për të monitoruar dhe menaxhuar përhapjen e rasteve të pneumonisë me origjinë të panjohur. Megjithatë, Pekini i ka minimizuar zhvillimet si një dukuri vjetore dimërore.
Çfarë është HMPV?
Metapneumovirusi i njeriut, ose HMPV, është një virus respirator që shkakton simptoma të ngjashme me ftohjen e zakonshme dhe gripin. Ndërsa sëmundja është zakonisht e lehtë, ajo mund të çojë në komplikime të rënda si pneumonia, veçanërisht tek foshnjat, të moshuarit dhe ata me sistem imunitar të dobësuar.
Virusi nuk është i ri, por ka fituar vëmendje mes një rritje të rasteve, veçanërisht te fëmijët nën 14 vjeç në Kinën veriore.
I identifikuar për herë të parë në vitin 2001 në Holandë, HMPV është një virus ARN me një zinxhir që përhapet përmes pikave të frymëmarrjes ose kontaktit me sipërfaqet e kontaminuara. Rastet janë identifikuar më parë në vende të ndryshme, edhe në Europë.
Simptomat e saj përfshijnë kollën, ethe, rrufë dhe lodhje, me një periudhë inkubacioni prej tre deri në gjashtë ditë. Ndryshe nga Covid-19, nuk ka vaksinë apo trajtim specifik antiviral për HMPV dhe trajtimi përfshin kryesisht menaxhimin e simptomave.
Rastet në rritje të HMPV në Kinë
Rritja në raste përkon me motin më të ftohtë dhe rritjen e aktivitetit të brendshëm, kushte që zakonisht nxisin përhapjen e viruseve të frymëmarrjes. Zyrtarët shëndetësorë theksojnë se kjo rritje është në përputhje me tendencat sezonale.
Administrata Kombëtare e Kontrollit dhe Parandalimit të Sëmundjeve të Kinës raportoi kohët e fundit një rritje të infeksioneve të frymëmarrjes, përfshirë HMPV, gjatë dimrit. Organizata Botërore e Shëndetësisë (OBSH) nuk e ka cilësuar situatën si një emergjencë globale shëndetësore, por rritja e rasteve ka shtyrë autoritetet të forcojnë sistemet e monitorimit.
Një program pilot është nisur për të gjurmuar pneumoninë me origjinë të panjohur, duke siguruar që laboratorët dhe agjencitë shëndetësore të raportojnë dhe menaxhojnë rastet në mënyrë më efektive.
A mund të përhapet virusi HMPV në vende të tjera?
Hong Kongu ka raportuar disa raste të HMPV. Vendet fqinje si Kamboxhia dhe Tajvani po monitorojnë nga afër situatën. Departamenti i Kontrollit të Sëmundjeve të Transmetueshme të Kamboxhias ka lëshuar paralajmërime për HMPV, duke vënë në dukje ngjashmërinë e tij me Covid-19 dhe gripin.
Qendrat për Kontrollin e Sëmundjeve të Tajvanit kanë thënë se rreziku më i lartë i virusit është tek fëmijët, të moshuarit dhe individët me imunitet të kompromentuar.
Në Indinë fqinje, zyrtarët thanë se nuk ka nevojë për panik pasi HMPV është “si çdo virus tjetër i frymëmarrjes”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
