Gazeta Si – Biznesmeni Gazmend Haxhia, i akuzuar nga SPAK si bashkëpunëtor i ish-ministrit të Shëndetësisë, Ilir Beqaj në dosjen e shpërdorimit të fondeve të BE-së, u lirua nga masa “arrest shtëpie” nga GJKKO.
Gjykata e Posaçme e zbuti masën e sigurisë ndaj tij këtë të enjte duke përcaktuar vetëm “detyrim paraqitje”.
Sipas hetimeve, Haxhia rezulton të jetë personi që ka fituar tenderin e SASPAC dhe Ministrisë së Turizmit te dosja “Beqaj” e abuzimit me fondet e Bashkimit Evropian.
Gazmend Haxhia, po ashtu është një prej aksionerëve të hotelit në Durrës, ku një pjesë e tyre u sekuestruan pak ditë më parë me urdhër të SPAK-ut.
Biznesmeni u ndalua mesditën e 8 korrikut nga policia sapo zbriti nga avioni në aeroportin e Rinasit. Avokati i tij Henrik Ligori tha se Haxhia u vetëdorëzua dhe njoftoi prokuroren e çështjes se do ndërpriste vizitën në Kinë për tu përballur me drejtësinë.
Prokuroria e Posaçme dyshon se Beqaj si drejtues i SASPAC, ka abuzuar me të paktën 8 procedura prokurimi nga agjencia për menaxhimin e fondeve të BE, duke fryrë shifrat në qindra mijëra euro drejt kompanive të ndryshme për shërbime të pakryera me përfitues vetë ish-ministrin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
