Gazeta Si – Hungaria do të vendosë veton ndaj embargos ruse të naftës që përfshihet në paketën e gjashtë të sanksioneve të BE-së.
Lajmin e ka bërë të ditur zëdhënësi i qeverisë së Budapestit, Zoltan Kovacs, i cili e ka quajtur “të papranueshëm” propozimin e Brukselit.
I pyetur nga BBC që e pyeti nëse vendi i tij do të ushtrojë të drejtën e vetos, zëdhënësi u përgjigj: “Po…. Në fund duhet të kujtojmë se si funksionon BE-ja, propozimi vjen nga Brukseli, që është administrativ dhe qendra burokratike e Bashkimit Evropian, jo e vendeve anëtare”.
Sipas Kovacs, BE-ja “e di saktësisht se ajo që po propozon bie ndesh me interesat hungareze, bie ndesh me mundësinë që është e realizueshme dhe se nëse e bëjmë atë, do të shkatërrojmë plotësisht ekonominë hungareze”.
Por edhe Shtetet anëtare të Bashkimit Evropian kanë kërkuar më shumë kohë për të shqyrtuar paketën e gjashtë të sanksioneve kundër Rusisë të paraqitur sot nga Komisioni Evropian.
Në takimin e sotëm, ambasadorët e BE-së nuk kanë mundur ta miratojnë paketën “duke kërkuar pak kohë për ta shqyrtuar atë”.
Masat e reja, të cilat në veçanti parashikojnë një embargo të naftës, bllokohen mbi të gjitha nga Hungaria.
Në fakt, Hungaria është kundër, sepse nuk sheh “garanci” për menaxhimin e periudhës së tranzicionit dhe për sigurinë e saj energjetike.
Në Budapest nuk mjaftoi as mundësia e zgjatjes së synuar të embargos deri në fund të vitit 2023, e kërkuar edhe nga Sllovakia dhe Bullgaria.
Në çdo rast, vendimi për paketën e re të sanksioneve është shtyrë për nesër ose të premten.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
