Profesori dhe fizikani i njohur i Universitetit të Tiranës, Artan Boriçi, ka humbur jetën si pasojë e koronavirusit.
Lajmi për ndarjen nga jeta të akademikut të asociuar, i cili ishte 56 vjeç, e ka bërë të ditur Akademia e Shkencave të Shqipërisë përmes një njoftimi në Facebook.
Boriçi ishte i vlerësuar në rrethin e kolegëve të Universitetit të Tiranës si një shkencëtar, i cili ia ka dalë të jetë pjesë e komunitetit shkencor ndërkombëtar me kontributin e tij të veçantë në shkencën e fizikës, duke hyrë në panteonin e elitës intelektuale.
Ai u bë anëtar i Akademisë së Shkencave në vitin 2020. Së bashku me institucione dhe personalitete të shquara të fizikës dhe matematikës botërore, 65-vjeçari ka marrë pjesë në organizimin e konferencave ndërkombëtare brenda dhe jashtë vendit.
Ai ka mbrojtur gradën doktor i shkencave matematike në ETH, Zyrih, Zvicër, në vitin 1996.
Titullin profesor e ka marrë në Universitetin e Tiranës, në vitin 2010.
Boriçi ka punuar në drejtimet kërkimore të fizikës teorike dhe llogaritëse dhe në fushën e financës llogaritëse në Institutin Paul Scherrer të Zvicrës; në shkollën e lartë politeknike federale të Zyrihut e në Universitetin e Ediburgut (1996-2003).
Boriçi punoi mbi 20 vjet si pedagog në Fakultetin e Shkencave të Natyrës.
Ka shërbyer si zëvendës-dekan i këtij fakulteti (2012) dhe si anëtar i këshillit shkencor.
Që prej vitit 2012, ai drejtonte grupin e fizikës llogaritëse dhe të energjive të larta në departamentin e fizikës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
