.png)
Kreditë e këqija shfaqin trend rënës për të tretin muaj radhazi, por kreditimi ende nuk çlirohet.
Sipas Bankës së Shqipërisë në muajin korrik kreditë me probleme kanë zbritur në 11.19% (niveli më i ulët i këtij viti).
Banka e Shqipërisë thotë se arsyet e rënies së nivelit të kredive të këqija janë shlyerja e tyre pas ristrukturimit, zgjatja e afatit dhe ulja e pagesave mujore dhe fshirja e një pjese të kredisë në këmbim të pagesës së pjesës tjetër.
Vetëm pak muaj më parë, Banka e Shqipërisë miratoi një plan shpëtimi të quajtur “Qasja e Tiranës”, për bizneset të cilët nuk kanë mbërritur të shlyejnë në kohë kreditë e marra në bankat e nivelit të dytë me vlerë mbi 8 milionë euro. Plani i shpëtimit do të nisë të aplikohet në muajin shtator për 9 korporata të cilat janë pjesë e grupit të të 35 kompanive që ishin problematike në kthimin e huave.
Banka e Shqipërisë e pyetur nga Gazeta “Si” për emrat e bizneseve problematikë në kthimin e huave pasi publiku duhet të jetë në dijeni për shëndetin e bizneseve ku shpenzojnë të ardhurat e tyre, përgjigjet se nuk mund të japë informacion për këtë çështje.
Disa banka ku ky grup biznesesh të cilët iu detyrohen rreth 8 milionë euro, do të kenë mundësi të rinisin aktivitetin pasi vetë bankat do ti ndihmojnë për të dalë nga falimentimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
