Ambasadori i SHBA-së në Kosovë, Jeffrey Hovenier, ka thënë se Kosova dhe Serbia duhet të zbatojnë marrëveshjet që kanë nënshkruar përmes procesit të dialogut.
Hovenieri tha se kjo përfshin edhe përparimin drejt themelimit të Asociacionit të Komunave me Shumicë Serbe.
Kreu i Ambasadës së SHBA-së në Kosovë u shpreh se e mbështesin dialogun e lehtësuar nga BE-ja, teksa shtoi se “jemi të inkurajuar që edhe Serbia edhe Kosova e kanë pranuar në parim propozimin e BE-së”.
“Ne mbështesim fuqimisht propozimin e BE-së që është në tryezë. Pritshmëria jonë është që të dy liderët ta çojnë përpara këtë propozim në takimin e tyre të ardhshëm.
Nëpërmjet dialogut, Serbia dhe Kosova duhet të arrijnë një marrëveshje gjithëpërfshirëse. Ne besojmë se marrëdhëniet e normalizuara duhet të përqendrohen në njohjen eventuale reciproke. Progresi në dialog do të hapë derën e Integrimit Evropian dhe është thelbësor për sigurinë dhe stabilitetin në Ballkanin Perëndimor”, tha Hovenieri për Klan Kosovën.
Më tej, Hovenieri tha se i inkurajon fuqishëm serbët e Kosovës të kthehen sa më shpejt në institucionet e Kosovës për të përmirësuar sigurinë dhe stabilitetin për të gjithë qytetarët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
