.png)
Piktura e humbur, nga Raffaello Sanzio, është portreti i një djali, ndoshta një autoportret i vetë piktorit, i cili në të kaluarën kishte qenë në pronësi të një koleksionisti nga Schio.
Sipas historisë së shkruar në libra, më pas piktura u shit në Holandë, përfundoi në duart e një artisti polak dhe mendohet se u shkatërrua përfundimisht nga nazistët.
Një thesar, ndoshta i humbur përgjithmonë gjatë Luftës së Dytë Botërore, rruga komplekse e të cilit është rindërtuar nga studiuesi Ezio Maria Simini në “Quaderni di storia e di Cultura Scledense”.
Sidoqoftë, jo gjithçka është e qartë dhe historia e pikturës “Portreti i një të riu” të Raphaelit është ende pjesërisht e mistershme. Historia thotë se, piktura u ruajt në minierën Altaussee, në Austrinë e Epërme. Kjo minierë është shndërruar në depon më të madhe të veprave të artit të grumbulluara në vitet e luftës.
Ndryshe nga shumë kryevepra të tjera, ajo nuk u gjet kurrë, pavarësisht punës së paçmuar të bërë nga njerëzit e Monumenteve, grupi i krijuar pikërisht për të gjetur artin e vjedhur nga gjermanët.
Ka nga ata që mendojnë se në realitet nuk është shkatërruar, por thjesht është zhdukur dhe ndoshta ka përfunduar në duart e ndonjë koleksionisti okult.
Nga muzeu kombëtar në Krakov, nga i cili është vjedhur piktura me urdhër të Hitlerit, ata konfirmojnë këtë tezë, duke shpjeguar se korniza origjinale bosh ende qëndron në muret e ekspozitës.
Në vitin 2012, u përhapën thashetheme për zbulimin e pikturës por ishte një mashtrim.
Për historinë e kësaj vepre është shkruar edhe një roman “Piktura e Rajhut” (Deti), nga shkrimtarja Caterina Boschetti.
Burimi: Il Giornale/Përshtati:Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
