.png)
Gazeta Si – Kryeministrja finlandeze Sanna Marin, ka përfunduar mes një “stuhie” vendase dhe ndërkombëtare për një seri videosh në Instagram, ku dyshohet se pas qëndron hija e hakerëve rusë.
Ajo shihet duke kërcyer në një festë të shfrenuar me miq të famshëm (yje të artit, influencues, deputetë të tjerë), dhe askush nuk duket shumë i kthjellët.
Gazeta gjermane “Bild”, e quajti Marin si “politikanen më të lezetshme në botë” javën e kaluar, duke e quajtur udhëheqësen 36-vjeçare moderne dhe me vetëbesim, por duket se pamjet e fundit po i prishin reputacionin.
Ajo u shpreh e mërzitur që videot e saj duke kërcyer në festa private u publikuan në internet, pasi ato ishin menduar të shiheshin vetëm nga miqtë.
“Këto video janë private dhe të filmuara në një hapësirë private. Më vjen keq që këto u bënë të njohura për publikun”.
Por kush i postoi videot? “Kisha besim se do të mbeteshin private, edhe sepse janë filmuar në një shtëpi ku kemi festuar, po, në mënyrë disi të vrazhdë. Jam e zhgënjyer”, tha kryeministrja.
Përhapja e tyre – mes miqsh – ishte llogaria private në Instagram e fotografes Janita Autio, një mike e ngushtë e kryeministres dhe ish-autorja e portretit të saj me pantallona të shkurtra në festivalin “Ruisrock”.
Megjithatë, si kanë mundur të bien në duar të mediave finlandeze këto video?
Ka nga ata që mendojnë se kjo është vepër e hakerëve rusë: Sanna Marin është kryeministrja që e drejtoi Finlandën drejt pikës së kthesës historike të anëtarësimit në NATO dhe u shpreh në favor të ndalimit të turistëve rusë.
Marin u tha gazetarëve se kishte konsumuar alkool, por ajo nuk ishte në dijeni të ndonjë përdorimi të drogës gjatë festës.
Mbështetësit ndërkohë e kanë mbrojtur atë. Marin ka mohuar se publikimi i videove ishte pjesë e një skeme shantazhi.
Vjeshtën e kaluar, kryeministrja kishte ftuar miqtë në shtëpinë e saj, duke shkelur protokollet e sigurisë; në dhjetor ajo kishte shkuar për të kërcyer pa telefonin presidencial; atëherë ajo u kishte kërkuar falje finlandezëve “për naivitetin”.
Megjithatë, për mbështetësit e saj (të shumtë), është tipari më i mirë i një vajze-kryeministre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
