Gazeta Si – Dy ngjarjet që tronditën Kamzën në një distancë kohore prej 40 minutash nga njëra-tjetra pas mesnatës, duket se kanë pas nga histori të ndryshme.
Policia po përpiqet të kuptojë nëse sulmi me armë në biznesin e një gruaje në Kamëz, ka apo jo lidhje me konfliktet familjare që shënjestra e atentatit kishte.
Pasi ka mbledhur gëzhojat në agjencinë funerale që është nën pronësi të shtetases E.M., e divorcuar prej kohësh, Policia e Kamzës i thotë Gazetasi.al se ka hapur të dhënat e gruas, e cila është e divorcuar dhe që ka qenë shpesh objekt hetimesh.
LEXO EDHE:
Dy ngjarje kriminale në Kamëz, tritol makinës luksoze dhe plumba ndaj një biznesi
Kjo e dhënë i thuhet Gazetasi.al në rrugë jo zyrtare, por nuk përjashtohen edhe konfliktet dhe pistat e tjera.
Megjithatë, agjentët i treguan Gazetasi.al, se gruaja E.M., ishte e martuar më herët me shtetasin S.M., me të cilin janë ndarë.
Pas divorcit, të dhënat paraprake tregojnë se çifti u përfshi në mosmarrëveshje për pronat dhe në kulmin e këtyre incidenteve ata shpesh kanë përfunduar në komisariat.
“Edhe shtetasi S.M., zotëron një agjenci funerale në të njëjtën zonë, pra në sheshin “Skënderbej”, aty ku ndërkohë e ka hapur edhe ish bashkëshortja e tij”, – tha për Gazetasi.al një oficer policie, që bën me dije se kjo e dhënë është dyshimi fillestar mbi hetimet e nisura për këtë sulm me armë.
Por ndërkohë, një tjetër ngjarje ndodhi në Kamëz, ku një automjet “Audi Q7” iu vendos lëndë plasëse.
Ngjarjet nuk kanë lidhje me njëra-tjetrën thotë policia zyrtarisht për Gazetasi.al, por nga veprimet e para, rezulton se mjeti luksoz i përket shtetasit Artan Lleshi, i cili është pronar i një biznesi që jep automjete me qira dhe që merret me elektronike.
“Ky shtetas, aktualisht gjendet në Shqipëri pas kontrollit të parë në sistemin TIMS”, – tha policia.
Kjo e fundit është e bindur se ngjarja nuk ka ndodhur për shkaqe banale dhe nuk ka lidhje me veprimtarinë e pukjanit në Britaninë e Madhe.
“Është një histori që ka lidhje direkte me veprimtarinë në Shqipëri dhe ‘backgroundin’ e këtij shtetasi këtu, por edhe lidhjet e tij me elementë të një grupi kriminal, që së fundmi ka probleme në SPAK”, – tha policia për Gazetasi.al.
Por nëse është i riu nga Puka një ushtar i një grupi kriminal, kjo gjë nuk u pohua në mënyrë përfundimtare, megjithëse u shtua se ka dyshime se ai ka lidhje dhe njohje me shtetasin E.M., një personzh i njohur i botës së krimit në vend.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
