.png)
Gazeta Si – Komiteti Gjyqësor i Dhomës së Përfaqësuesve në Kongresin Amerikan, të udhëhequr nga Partia Republikane, kërkon informacion nga FBI në lidhje me Charles McGonigal.
Ish-zyrtari i lartë i kundërzbulimit në zyrën në terren të byrosë në Nju Jork, u akuzua javën e kaluar për shkelje të sanksioneve të SHBA-së ndaj Rusisë dhe vepra të tjera të lidhura me to.
Kryetari i Komitetit Gjyqësor Jim Jordan, një republikan i Ohajos dhe deputeti Matt Gaetz, një republikan nga Florida, i shkruan një letër drejtorit të FBI-së, Chris Wray të enjten duke kërkuar materiale dhe informacione për McGonigal si pjesë e një hetimi mbi akuzat për paragjykime politike në byro, raporton CBS news.
“Ju lutem siguroni informacion në lidhje me të dhënat personale të Charles McGonigal, duke përfshirë historikun e punës së tij, formularët e vlerësimit, sigurisë dhe dokumente të lidhura me to”, – thuhet në letër.
Ata kërkojnë detaje sa më shpejt të jetë e mundur, “jo më vonë se ora 17:00 e datës 16 Shkurt, 2023”, – shkruhet në letër.
Në një padi të ngritur nga një Gjykatë në Nju Jork, ish-agjenti special i FBI-së, është akuzuar për pastrim parash, shkelje të sanksioneve të SHBA-ve dhe vepra të tjera të lidhura me punën e tij me oligarkun rus Oleg Deripaska.
Edhe në Shqipëri, çështja është shndërruar në një kalë beteje nga opozita, e cila i ka kërkuar shpjegime kryeministrit Rama për takimet e tij me MCGonigal. Partia Demokratike ka kërkuar ngritjen e një Komisioni Hetimor për këtë çështje.
Në aktakuzën e ngritur në Uashington për dosjen hetimore, thuhet se McGonigal shoqërohej nga ish-spiuni shqiptar Agron Neza kur u takua fshehurazi me kryeministrin shqiptar Edi Rama në shtator 2017, ku i dha Ramës pajisje të FBI-së dhe i ofroi këshilla për licencat fitimprurëse të shpimit të naftës.
McGonigal akuzohet gjithashtu se ka fshehur nga FBI detajet kryesore të një udhëtimi të vitit 2017 në Shqipëri me ish-zyrtarin e inteligjencës shqiptare, i cili dyshohet se i ka dhënë të paktën 225,000 dollarë në tre pagesa të veçanta në para.
Pasi arriti atje, sipas Departamentit të Drejtësisë, McGonigal u takua me kryeministrin e Shqipërisë dhe kërkoi kujdes në dhënien e licencave të shpimit të fushës së naftës në vend për kompanitë ruse.
Pas arrestimit të shtunën e shkuar në Nju Jork, McGonigal u la i lirë dy ditë më pas, pasi pagoi një shumë dollarësh për t’u hetuar në gjendje të lirë. Ai nuk i pranoi akuzat, duke e cilësuar veten të pafajshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
