Ljuis Hemilton rrezikon të ndëshkohet për mungesën e pajustifikuar në ceremoninë e fundvitit, që zhvillohet çdo vit në Paris mbrëmjen e 16 dhjetorit. Rregullat e Formulës 1 detyrojnë tre pilotët e parë të Botërorit të jenë të pranishëm në këtë ceremoni, por Hemilton dhe drejtuesi kryesor i Mercedesit, Toto Volf, e kanë braktisur eventin në shenjë proteste për vendimet e garës së Abu Dhabit.
Më shumë se një sanksion sportiv, me shumë mundësi do të jetë një gjobë për pilotin anglez. “Nëse ka shkelje rregullash, nuk do ta anashkalojmë, – ka thënë presidenti i ri i FIA-s, Mohamed ben Sulayem, për BBC-në. – Ka gjithmonë vend për falje, por rregullat janë rregulla. E di që Ljuis është shumë i trishtuar për atë që ndodhi, por të shohim. Jam president prej pak orësh dhe nuk mund të flas më shumë pa ditur faktet”.
Sipas artikullit 6.6 të reegullores, “pilotët që e përfundojnë kampionatin në vend të parë, të dytë dhe të tretë, duhet të jenë të pranishëm në ceremoninë e përvitshme të FIA-s për ndarjen e çmimeve”.
Ben Sulayem ka pohuar se është informuar nga Toto Volf se piloti nuk do të merrte pjesë në ceremoni. “Është e thjeshtë të jesh xhentil me njerëzit, – shton presidenti i FIA-s, – nuk kushton asgjë të jesh xhentil. Duhet edhe për motivim, por sigurisht, nëse ka një shkelje, nuk ka falje”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
