Ashtu siç ishte paralajmëruar, të martën e 14 qershorit Dhoma e Avokatisë nisi bojkotin tre ditor për të gjitha shkallët e gjyqësorit
Në shenjë kundërshtie për hartën e re gjyqësore, avokatët kanë vendosur të mungojnë në seancat gjyqësore, përveç atyre ku jepet masa e sigurisë.
“Nëse ndonjë prej avokatëve nuk i bindet urdhrit për bojkot, do të merren masa deri në heqje të licensës”, tha kryetari i Dhomës së Avokatisë Maksim Haxhia.
LEXO EDHE:
Qeveria e kundërshtoi një herë hartën e re gjyqësore të KLGj
Vetëm në gjykatat e Tiranës, GJKKO, Dhoma Penale, Civile, Apeli Tiranë dhe Administrative janë planifikuar të zhvillohen 215 procese gjyqësore të cilat nisin prej orës 08:00 deri në 15:30.
Raportohet se në të gjithë vendin vetëm të martën janë pezulluar rreth 460 çështje gjyqësore.
Ministria e Drejtësisë ndërkohë ka dhënë dakordësinë për hartën e re ku nga 22 gjykata të shkallës së parë bëhen 13 dhe nga 6 Apele bëhet 1.
Brenda pak ditësh, kjo hartë pritet të shkojë në qeveri për miratim. Ndërsa pritet edhe mendimi i Prokurorisë së Përgjithshme dhe Këshillit të Lartë të Prokurorisë.
Që do të thotë se nëse kalojnë të gjitha hallkat të ardhmen do të kemi 13 gjykata të shkallës së parë, 2 gjykata administrative dhe 1 gjykate apeli për të gjithë vendin.
Me vendimin e ri shkrihen gjykatat në Tropojë, Krujë, Lushnje, Pogradec, Mat, Përmet, Kurbin, Kavajë, Pukë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
