‘Gruaja e thyer’, në Festivalin Ndërkombëtar të Monodramës në Bullgari

Teatri Kombëtar Eksperimental “Kujtim Spahivogli” përfaqëson për herë të parë Shqipërinë në Festivalin Ndërkombëtar të Monodramës “To the stars” në Varna, Bullgari, me monodramën “Gruaja e thyer” me regji të Endri Çela dhe interpretimin e Adriana Tolka.

Festivali Ndërkombëtar i Monodramës “To the Stars” sot shënon natën e fundit (nga 3-9 gusht) në Qendrën e Festivalit dhe Kongresit në qytetin port të Varnës, organizuar nga Fondacioni Osnova-Ta.

Ky festival u zhvillua nën kujdesin e zëvendëspresidentes Iliana Iotova.

Edicioni i 11-të i këtij festivali prezantoi monoperformancën kolektive të Marius Kurkinskit “Marius 50”, monoperformancën e Zdrava Kamenovës “The Hit of the Season”, me regji të Elitsa Yovcheva, “Our Yunus”, Monodramë nga Turqia, “Gruaja e thyer” nga Shqipëria, “Arka – Box” nga Kosova etj.

Monodrama “Gruaja e thyer” është një shfaqje kontemporane, ku gjithçka buron nga e brendshmja e personazhit: lëvizja trupore, fjala, imazhi, muzikaliteti, e kënduara dhe e luajtura e muzikës “live”.

“Muriel, 43 vjeç, pas pesë vitesh që jeton e vetme dhe e mbyllur në apartamentin e saj, mezi pret të nesërmen për tu takuar me bashkëshortin dhe të birin e mitur, që jeton me të atin", thuhet nga Teatri Kombëtar Eksperimental.

Shfaqja u duartrokit gjatë nga të pranishmit në Varna të Bullgarisë dhe mori vlerësime pozitive nga personalitete të fushës si regjisori dhe aktori Thierry Harcourt (i ftuar special i festivalit) dhe veçanërisht dhe nga Drejtori i festivalit, Marius Donkin, i cili e ftoi shfaqjen në edicionin e radhës të këtij festival, i cili do të zhvillohet në shkurt 2024 në Sofje.

Teatri Kombëtar Eksperimental “Kujtim Spahivogli” mori gjithashtu ftesë nga festivali ndërkombëtar i teatrit “Scene at the Crossroads”, që do të zhvillohet në muajin shtator 2024 në Plovdiv, Bullgari, festival i cili ka tashmë 24 vite që organizohet në skenën e teatrit më të hershëm në Bullgari.

Festivali Ndërkombëtar i Monodramës “To the stars” gjithashtu ishte dhe një takim dhe diskutim për herë të parë mes psikoanalistëve, mjekëve, artistëve, kulturologëve, muzikantëve, shkrimtarëve, gazetarëve.

Festivali Ndërkombëtar i Monodramës është themeluar nga aktori Marius Donkin në vitin 2006, i cili është qytetar nderi i Sofjes dhe Varnës, i cili tashmë ka pritur njëmbëdhjetë edicione të veprimtarisë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.