Gripi i tipit A dominon Evropën, OBSH: Shqipëria dhe 2 vende të tjera rritje të rasteve të rënda respiratore

Nga Gazeta Si- Shqipëria raporton shifra të larta të infeksioneve akute respiratore që i referohen viruseve të ngjashme me gripin, një prej të cilave është dhe virusi respirator HMPV.

OBSH në raportin e saj më të fundit për javën e parë të janarit 2025 tregon se normat e sëmundjeve të ngjashme me gripin janë ngritur mbi bazën fillestare në 14 vende dhe shkalla e infeksionit akut respirator është rritur në 3 vende (Shqipëri, Bullgari dhe Lituani).

Sipas OBSH, përqindjet e sëmundjeve të ngjashme me gripin dhe/ose infeksionet akute të frymëmarrjes janë ngritur mbi nivelet bazë në 16 nga 30 vende dhe zona të Rajonit Evropian të OBSH-së që raportuan të dhënat këtë javë.

“Pozitiviteti i përqindjes së gripit dhe numri i rasteve për kujdesin parësor në nivel Rajonal mbetet i lartë, megjithëse ka ndryshime të konsiderueshme në nivel vendi/zone. Përqindja pozitive për rastet e gripit SARI (Infeksion I rëndë respirator akut) ka vazhduar të rritet, ku grupmosha më e prekur janë të moshuarit. Shtrimet në spital për grip janë rritur ndjeshëm ku influenca A(H1) është nëntipi dominues në të gjithë rajonin”, thotë OBSH.

Më tej, në raportin për javën e parë të muajit janar 2025, OBSH raporton se pozitiviteti i RSV mbetet i moderuar në nivel rajonal ndërsa rastet me Covid-19 mbeten të ulëta në nivel rajonal, me disa ndryshime në nivel vendi.

Ndërkohë, gripi mbeti mbi pragun e epidemisë prej 10% në 36% krahasuar me 50% në javën e kaluar.

Norma mesatare e pozitivitetit për 15 vende dhe zona ishte 30% dhe 14 vende dhe zona raportuan të paktën 10%.

Zbulimet e virusit me tip të njohur të raportuara nga kujdesi parësor për javën e kaluar ishin kryesisht viruse të gripit A (84%) dhe, midis viruseve A, kishte një përzierje të nëntipeve A ( H1) dhe A(H3).

Nga 32 vende dhe zona që raportojnë për intensitetin e gripit: 14 raportuan me intensitet mesatar ose më të lartë.

Ashpërsia e infeksionit

Në të gjithë rajonin, 20% e qytetarëve të paraqitur në spitale dolën pozitivë me virusin e gripit, krahasuar me 16% në javën e kaluar. Pozitiviteti mesatar nga 11 vende dhe zona që raportuan të dhënat ishte 23%.

Midis ekzemplarëve SARI, u raportuan 369 zbulime të virusit të gripit nga rrjeti këtë javë, të cilat ishin kryesisht të tipit A të gripit (87%).

Nga 78 që ishin nëntipa, 15% ishin A(H3) dhe 85% ishin A(H1).

Normat e vdekjeve nga COVID-19 mbetën të ulëta midis 39 vendeve që raportuan të dhëna.

SARS-CoV-2, varianti XEC dominant

XEC është klasifikuar që në shtator si varianti dominant i Covid-19.

Që nga 7 dhjetor 2024, variantet që qarkullojnë në përmasat mesatare janë XEC (46%), KP.3 ( 36%), BA.2.86 (17%).

Aktualisht nuk ka asnjë provë të rritjes së ashpërsisë klinike për XEC në lidhje me variantet dominuese më parë të SARS-CoV-2 dhe nuk ka dëshmi të rritjes së shtrimeve në spital, pranimeve në ICU ose vdekjeve nga Covid-19.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.