Greqia dhe Turqia kanë rënë dakord që të rifillojnë bisedimet e ashtuquajtura “eksploruese”, ku palët u komunikojnë njëra-tjetrës qëndrimet që kanë mbi çështje të caktuara. Njoftimi është dhënë shkurtimisht nga Ministria e Jashtme greke, por pa dhënë një datë konkrete.
Ministria e Jashtme greke thotë se bisedimet eksploruese do të mbahen në Stamboll “së shpejti”. Bisedimet pritet që të rifillojnë javën e ardhshme dhe ato pasojnë bisedën e Presidentit turk, Rexhep Taip Erdogan me Kancelaren gjermane, Angela Merkel dhe Presidentin e Këshillit Europian, Charles Michel.
Megjithëse ky zhvillim u mirëprit në kancelaritë europiane, në Athinë dhe Ankara nuk janë edhe aq entuziastë. Palët kanë ndasi thelbësore sa i takon pretendimeve të tyre. Erdogan ka kërkuar më herë që Greqia të largojë ushtrinë nga ishujt, që sipas Turqisë përcaktohen si të demilitarizuar në marrëveshjen e Lozanës.
Gjithashtu, Turqia ka lëshuar një tjetër Navtex, duke rezervuar zonën detare përreth ishullit grek Lemnos, ndërsa Erdogan ka propozuar thirrjen e një tryeze me të gjitha vende Mesdhetare, duke përfshirë këtu edhe Qipron Veriore, që njihet si shtet vetëm nga Ankaraja.
Në Athinë e shohin lëvizjen e Erdogan për t’u ulur në tryezën e bisedimeve si manovër për të shmangur sanksionet e mundshme të Bashkimit Europian, që do të mblidhet në një samit në fillim të muajit tetor. Samiti ishte parashikuar për më 24 dhe 25 shtator, por u shty pasi njëri prej truprojave të Charles Michel, President i Këshillit Europian rezultoi pozitiv me Covid-19.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
