.png)
Gazeta Si – Një 50-vjeçare shqiptare humbi jetën gjatë një aksidenti në punë në qytetin Mesolongi të Greqisë.
Viktima, e quajtur Ana sipas mediave greke, kishte shkuar për të pastruar makinerinë që pret mishin në një dyqan. Por fatkeqësisht, gruas shqiptare iu bllokuan flokët tek makineria dhe humbi jetën.
Menjëherë pas ngjarjes tragjike, policia ka arrestuar pronarin e objektit ku punonte shqiptarja.
Trupi i Anës është dërguar në Patra për autopsi, ndërsa varrimi pritet të bëhet në ditët në vijim në Evinochori.
Sipas njerëzve që e njihnin, ajo punonte me të bijën nga mëngjesi deri në mbrëmje për të siguruar jetesën.
“Vajza e saj po pastronte përpara dhe nëna ishte në kuzhinë. Në një moment vajza dëgjoi zëra. Ajo vrapoi dhe pa nënën e saj në këtë gjendje”, tha një i afërm i viktimës për protothema.gr.
“Vajza e saj doli në rrugë dhe bërtiste ‘ndihmë’”, raportojnë personat që ndodheshin aty.
Një kalimtar ka hyrë në dyqan dhe ka zbuluar tmerrin që kishte ndodhur. Vajza më pas filloi të bërtiste, pa mundur të besonte se çfarë kishte ndodhur para syve të saj. Mediat greke shkruajnë se më pas, vajza u dërgua në spital në gjendje shoku. Ajo dhe vëllai i saj 10-vjeçar ndodhen që nga mëngjesi i djeshëm në shtëpinë e një të afërmi.
Gruaja prej dy vitesh jetonte në Mesolongji me nënën dhe dy fëmijët, vajzën 18-vjeçare dhe djalin 10-vjeçar, pasi u largua nga Shqipëria pas ndarjes me bashkëshortin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
