.png)
Gratë e reja me kancer të gjirit janë në rrezik më të lartë për t’u prekur nga sëmundja sipas një studimi të fundit global. Rreziqet e përhapjes së hershme të kancerit të gjirit mund të jenë midis 6 dhe 22 për qind sipas hulumtimit të paraqitur në Konferencën e Gjashtë Ndërkombëtare të Konsensusit të Avancuar për Kancerin e Gjirit në Britani. Studimi, i cili pa të dhënat e dhjetëra mijëra gra ndërkombëtarisht, zbuloi se në përgjithësi rreziku i përhapjes së kancerit pas diagnostikimit të hershëm te gratë nën 35 vjeç varionte nga 12.7 për qind në 38 për qind. Gratë e moshës 50 vjeç e lart kishin një rrezik prej 3.7 për qind deri në 28 për qind. Elieen Morgan, nga Agjencia Ndërkombëtare për Kërkime mbi Kancerin tha se ndryshimi në rrezik mund të jetë për shkak se “gratë e reja kanë një formë më agresive të kancerit të gjirit ose sepse ato diagnostikohen në një fazë të mëvonshme”.
“Kanceri i gjirit është forma më e zakonshme e kancerit në botë. Shumica e grave diagnostikohen kur kanceri i tyre është i kufizuar në gji ose është përhapur vetëm në indet e afërta. Por në disa gra, kanceri do të rritet dhe do të përhapet në pjesë të tjera të trupit ose do të kthehet në një pjesë të ndryshme të trupit disa vite pas përfundimit të trajtimit të tyre fillestar. Në këtë pikë kanceri bëhet shumë më i vështirë për t’u trajtuar dhe rreziku për të vdekur është më i lartë,” shtoi ajo.
Por ajo shpjegoi se numri i njerëzve që zhvillojnë atë që quhet “kanceri metastatik i gjirit” është i panjohur sepse këto të dhëna nuk mblidhen në mënyrë rutinore nga organet zyrtare.
Hulumtimi tregoi gjithashtu se shkalla e rikthimit të kancerit pas një diagnoze fillestare dhe përhapjes në organe të tjera ishte ulur që nga vitet 1980. Por një pjesë e uljes së normave mund të jetë për shkak të vonesës kohore midis diagnozës së parë të kancerit të gjirit dhe shenjave të përhapjes së tij.
Shani Paluch-Shimon, drejtor i Njësisë së Gjirit në Spitalin Universitar Hadassah në Izrael tha se ka pasur një hendek njohurish se sa njerëz jetojnë me kancer të avancuar të gjirit në mbarë botën.
“Ky studim është një hap drejt plotësimit të këtij boshllëku,” shtoi ai.
Rreth 2.3 milionë njerëz diagnostikohen me kancer të gjirit çdo vit në nivel global, megjithatë ky studim ishte i pari i këtij lloji për të hetuar se sa pacientë zhvillojnë kancer të avancuar të gjirit.
Burimi:The Indpendent/Përshtati:Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje