Gazeta Si – Kualifikimi i Vllaznisë së futbolllit të femrave në grupet e Ligës së Kampionëve ishte një arritje historike, por paraqitja në këtë nivel po lë për të dëshiruar. Për fatin e tyre të keq, vajzat shkodrane ranë në grup me klube të mëdha, si Çelsi, Real Madrid dhe PSG.
Mbrëmjen e sotme Vllaznia pësoi disfatën e radhës në stadiumin “Loro Boriçi”, ku u mund 0-4 nga skuadra parisiene, që shënoi nga 2 gola në çdo pjesë, duke mos u lënë asnjë shans vajzave kuqeblu.
Në katër ndeshje të luajtura deri tani Vllaznia ka pësuar katër humbje. Edhe më të rëndë e bën situatën fakti që kampionet e Shqipërisë nuk kanë shënuar asnjëherë në këto katër ndeshje. Goli duket një mision i pamundur për Megi Doçin dhe shoqet e saj. Golaverazhi është vërtet i frikshëm: 0-19.
Për pikë nuk bëhet fjalë. Grupi A, ku bën pjesë Vllaznia, kryesohet nga Çelsi me 9 pikë dhe më pas vijnë PSG me 7 pikë dhe Real Madrid me 4 pikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
