Gazeta Si – Trupa Federale e Apelit ka shkuar përtej kërkesës së prokurorit Kinè. Ndëshkime të rënda edhe për drejtuesit e klubit: 2 vjet e gjysmë për Paratiçin, 2 vjet për Anjelin dhe Arrivabenen, 1 vit e 4 muaj për Kerubinin dhe 8 muaj për Nedved.
Goditje shumë e rëndë për Juventusin. Trupa Federale e Apelit shkoi më shumë se 9 pikët e kërkuara nga prokurori si ndëshkim për kampionatin aktual dhe e ka dënuar klubin bardhezi me 15 pikë penalizim. Juventusi zbret kështu në vend të 10-të, me 22 pikë, shumë larg zonës së Championsit. Nuk ka masa për 8 klubet e tjera të përfshira në çështje.
Juventusi do të bëjë rekurs me siguri në Kolegjin e garancisë së CONI-t.
Argumentimi i dënimit është: plusvalenca fiktive në bilancet e datave 30.6.19 dhe 30.7.20, si dhe në 2021-shin. Këto bilance kanë bërë të mundur që Juventusi të reduktojë humbjet dhe të bëjë merkato, me efekt favorizues në planin e kompeticioneve sportive, ku ka marrë pjesë në këto sezone.
Penalizimi e zbret Juventusin në një pozicion në këtë moment të sezonit, që e lë atë jashtë pjesëmarrjes në kompeticionet europiane. Aktualisht vendin e 4-t e merr Lacio, me pikë të barabarta me Atalantën dhe Romën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
