.png)
Gazeta Si – Gjykata e Lartë ka refuzuar rekursin e 7 personave të akuzuar në grabitjen e 4.6 milionë eurove në Rinas në prill 2019, duke lënë në fuqi dënimin total prej 122 vitesh burg.
Sipas vendimit, Klement Çala është dënuar me 20 vite, ndërsa secili nga 6 të tjerët ka marrë nga 17 vite burg.
Në dosjen hetimore të Prokurorisë së Posaçme, thuhet se truri i organizimit të grabitjes ishte Admir Murataj që u vra, ditën e ngjarjes gjatë një shkëmbimi zjarri me forcat e policisë.
Po ashtu krahu i tij i djathtë në këtë ngjarje është cilësuar Klement Cala, që u dënua me 20 vite burg. Ndërsa nga 17 vite heqje lirie është vendosur për 6 të pandehurit e tjerë, Eldi Cala, Oltjan Veseli, Renaldo Sula, Saimir Cela, Elton Pikli dhe Alkond Bengasi.
Edhe pse u shpllën fajtorë me vendim të formës së prerë, ata nuk i kanë pranuar akuzat e prokurorisë. Alkond Bengasi fillimisht bashkëpunoi me autoritetet, por më pa u tërhoq.
I dyshuar për këtë ngjarje është edhe i shumëkërkuari Talo Çela, por çështja në ngarkim të tij është ndarë pasi vazhdon që të jetë në kërkim nga autoritetet.
Edhe pse kanë kaluar 4 vite që nga kjo ngjarje nga ana e grupit të hetimit nuk janë mundur që të gjendet paratë që janë grabitur. Gjatë arrestimit, atyre u është gjetur një sasi shumë e vogël parash, që janë krahasuar me numrin e serive të parave të humbura nga bankat e nivelit të dytë.
Në 9 prill 2019, grupi i grabitësve u futën në aeroportin e Rinasit me një furgon të bardhë me mbishkrimin “Hetimi Tatimor”. E gjithë ngjarja ka zgjatur rreth 5 minuta.
Ata ishin të maskuar me maska silikoni. Në dosje thuhet se furgonët ishin modifikuar në një servis në qytetin e Elbasanit.
Nën kërcënimin e armëve të zjarrit, vodhën një sasi të konsiderueshme vlerash monetare, të cilat po ngarkoheshin në një avion linje drejt Austrisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
