.png)
Gazeta Si – Ish-kryebashkiaku i Kukësit, Safet Gjici është ankuar në Apelin e Juridiksionit të Përgjithshëm për vendimin e Gjykatës së Elbasanit, e cila i rrëzoi vendimin për lirim para kohe me pretendimin se është sëmurë.
Avokati i Gjicit, Përparim Kulluri, kërkoi nga gjykata caktimin e ekspertëve që të përcaktojnë gjendjen shëndetësore të klientit të tij, gjë e cila u pranua nga trupa e gjykimit.
Në seancën e radhës të datës 12 maj, në Apel pritet të paraqiten ekspertët dhe t’i japin gjykatës aktet e përgatitura, të cilat do të tregojnë nëse ish-kryebashkiaku socialist është apo jo në gjendje të marrë trajtim të nevojshëm mjekësor në kushtet e burgut, apo nëse i rrezikohet jeta nga qëndrimi në qeli.
Safet Gjici është dënuar për shpërdorim detyre dhe korrupsion pasiv nga Apeli i GJKKO. Safet Gjici u arrestua në muajin qershor 2023 pas publikimit në rrjete sociale të një videoje erotike mes tij dhe Alma Kaçit në zyrë.
Ai u u dënua përfundimisht nga Apeli i Posaçëm në muajin qershor të këtij viti me 4 vite e 6 muaj burg, dënim i cili u reduktua në 3 vite për shkak të gjykimit të shkurtuar. Edhe Alma Kaçi u dënua nga Apeli me një vit burg.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
