.png)
Gazeta Si – Gjykata e Tiranës ka dënuar me 55 vite burgim vrasësit e dyshuar të biznesmenit Edmond Papa teksa 49-vjeçari po konsumonte kafe në një lokal në orët e pasdites në zonën e Selitës në Tiranë në 16 dhjetor 2022.
Ata janë Andrew Bode, i dënuar me 30 vite burgim, i dyshuar si ekzekutor dhe Albano Velo i dënuar me 25 vite burgim, i dyshuar si organizator.
Trupa gjykuese zbatoi kërkesën e Prokurorisë, që kishte kërkuar të njëjtën masë dënimi për dy të akuzuarit.
Për hetuesit, Bode është personi që qëlloi me disa plumba ndaj Papës dhe më pas u ndihmua të largohej nga vendi i ngjarjes nga Velo.
Hetimet treguan se biznesmeni Edmond Papa dhe i vëllai i tij ishin ndjekur për disa kohë nga autorët e kësaj ngjarjeje deri në realizimin e atentatit.
Prokuroria ka gjetur prova në pajisjet telefonike të të hetuarve, ku kërkohet nga Velo interesimi për targën e makinës së përdorur nga vëllai i viktimës.
Motiv për vrasjen konsiderohet vrasja e të riut Aleksandër Sadikaj me shpërthim eksplozivi më 11 qershor 2022 në Tiranë.
Dy të pandehurit janë lidhje shoqërore e Sadikajt, dhe ky i fundit dyshohet të ishte përfshirë në një konflikt me Papën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
