.png)
Gazeta Si – GJKKO ka kaluar për gjykim dosjen ndaj ish-kryetarit të Bashkisë së Shkodrës, Bardh Spahia, për veprën penale të “pengimit të ekzekutimit të vendimit të gjykatës”.
Pas daljes nga GJKKO, dha një prononcim për mediat, ku u shpreh se akuza ndaj tij nuk qëndron. Ish-kryebashkiaku i Shkodrës, tha se akuza është ngritur mbi baza e porosi politike, teksa theksoi se këto do të marrin përgjigjen e duhur më 11 maj, ditën e zgjedhjeve parlamentare.
“Ishte formalitet i gjykatës për ta dërguar çështjen time për gjykim. Nuk pranova gjykimin e shkurtuar, kërkova gjykimin normal duke qenë i bindur se është padi e përgatitur në zyrat e PS, të cilët përdorin një person të dënuar për vjedhje dhe korrupsion, për të ngritur padi ndaj meje për ta përdorur politikisht në kohë elektorale. Akuza nuk qëndron. Kam zbatuar vetëm ligjin. Akuza dhe padia është e ngritur mbi baza dhe porosi politike që do marrin përgjigjen e duhur më 11 maj. Nuk do të na ndalojë apo ngadalësojnë në rrugën e fitores më 11 maj”, – tha Spahia.
Sipas SPAK, nga pozicioni i kryebashkiakut Spahia ka larguar nga detyra, M.M., administrator i Ujësjellës Kanalizime Shkodër dhe ka emëruar një person tjetër.
I pari ka kundërshtuar gjyqësisht këtë urdhër dhe gjykata ka pezulluar urdhrin e largimit deri në një vendim të formës së prerë. Por, referuar hetimit, edhe pse ka pasur dijeni për vendimin e Gjykatës Spahia ka emëruar një tjetër administrator. Ish-kryebashkiaku i Shkodrës u kallëzua nga ish-drejtori i Ujësjellësit të Shkodrës, Mark Molla.
SPAK ka arritur në përfundimin se Spahia, në cilësinë e kryetarit të Asamblesë së Përgjithshme të Ujësjellës Kanalizimeve Shkodër, ka marrë dy vendime në korrik të vitit 2022, për të shkarkuar administratorin e Ujësjellës Kanalizimeve Mark Molla dhe emëroi Arvit Bushatin, që ishte një anëtar i FRPD-së.
Ish-drejtori i Ujësjellësit të Shkodrës është ankuar në gjykatë dhe ka fituar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
