Gazeta Si – Në dy aksione të ndryshme të koduara “Camouflage 5” dhe “Hostel” është goditur aktiviteti i paligjshëm i transportit të tyre dhe dhënies së ndihmës për kalim të paligjshëm të kufirit.
Në aksionin “Camouflage 5” u arrestua Artan Frroku 40 vjeç dhe u shpall në kërkim bashkëpunëtori i tij A.L. 24 vjeç.
Këta persona, thotë policia, kryenin transportin e emigrantëve të paligjshëm nga Devolli në Tiranë kundrejt pagesës.
Më pas, pasi i strehonin emigrantët e paligjshëm në Tiranë, me ndihmën e personave të tjerë, dhe kryenin transportin e tyre drejt Kukësit, me qëllim kalimin në Kosovë dhe më pas në vendet e BE-së.
40-vjeçari u kap në flagrancë duke ndihmuar 5 emigrantë për të kaluar në mënyrë të paligjshme.
Ndërsa në operacionin “Hostel”, u arrestua V.K., 59 vjeçe, për veprat penale ndihma për kalim të paligjshëm të kufirit dhe fshehje e të ardhurave.
Në hotelin që administronte në Laprakë, gruaja kishte strehuar 9 emigrantë që kishin hyrë në mënyrë ilegale në Shqipëri, të cilëve kundrejt shpërblimit monetar, iu kishte premtuar dhënien ndihmë për transportimin e tyre, drejt pikave të kalimit kufitar.
Të 14 emigrantët e paligjshëm që u kapën në dy aksionet janë proceduar penalisht nga policia.
Ndërkohë, një 36-vjeçar që transportonte emigrantë të paligjshëm është arrestuar nga policia. L.D. 36 vjeç nga Peshkopia, u kap në aksin Tepelenë-Memaliaj duke transportuar me makinën e tij tip Ford 4 emigrantë të paligjshëm nga vendet e Lindjes së Mesme.
Ai u arrestua nga Policia e Gjirokastrës dhe akuzohet për dhënie ndihme për kalim të paligjshëm të kufijve.
Në cilësinë e provës materiale u sekuestruan automjeti, një celular dhe një shumë parash që dyshohet se është përfituar nga kjo veprimtari kriminale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
