Gazeta Si – Berat Gjimshiti tregon nivelin e tij të lartë ndaj Juventusit. Atalanta e tij barazoi pa gola në Bergamo ndaj ekipit të Alegrit, ndërsa mbrojtësi kuqezi, kapiten në ndeshjen e fundit të Kombëtares, ishte mes më të mirëve në fushë.
Shtypi sportiv italian e ka vlerësuar me notën 6.5 lojën e Gjimshitit në këtë ndeshje, duke evidentuar paraqitjen solide të shtatlartit, si dhe rrezikshmërinë e tij në goditjet nga këndi të Atalantës.
Pas këtij barazimi, Juventusi mbetet 4 pikë nga kreu i renditjes së Serisë A (14 pikë ndaj 18 të Interit dhe Milanit). Bardhezinjtë mbajnë vendin e 4-t, kurse Atalanta të 5-tin me vetëm një pikë më pak.
Empoli i shqiptarëve u mund 3-0 në fushën e Bolonjës. Titullar luajti vetëm portieri Etrit Berisha, sulmuesi Stiven Shpendi u aktivizua si zëvendësues në minutat e fundit, kurse mbrojtësi Ardian Ismajli qëndroi në stol, pasi vjen nga dëmtimi. Berisha bëri disa pritje shpëtuese në këtë ndeshje, duke marrë vlerësime nga shtypi italian.
“Berisha 7: në pjesën e parë mban në lojë Empolin me dy pritje të mëdha ndaj Ndoje dhe Zirkzi. Reaktiv edhe në pjesën e dytë ndaj Ferguson. Në rastet e golave të Orsolinit nuk mund të bënte asgjë”. Ky është përshkrimi i paraqitjes së portierit kuqezi në ndeshjen ndaj Bolonjës. Edhe pse pësoi 3 gola, ai ka marrë notën më të lartë për skuadrën e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
