Gazeta Si – Gjermania, pasi ka shkarkuar trajnerin Hansi Flik për shkak të rezultateve tejet negative, është vënë në kërkim të pasuesit të tij. Kandidat kryesor për të marrë vendin e tij është ish-trajneri i Bajern Mynih.
Flik nuk është më trajner i Gjermanisë, ai u shkarkua si pasojë e rezultateve të dobëta, që kulmuan me humbjen 1-4 në miqësoren me Japoninë. Ishte pika klasike në fakt, që derdhi gotën e ujit.
Kombëtarja e drejtuar nga Flik u eliminua që në turin e parë të Botërorit të Katarit, por në atë moment Flik u konfirmua. Tani nuk ka më durim për drejtuesit e Federatës Gjermane të Futbollit, ndërkohë që në shtyp flitet edhe për një komplot nga ana e lojtarëve ndaj tashmë ish-trajnerit të tyre.
Favorit për t’u ulur në stolin e ‘Pancerave’ është Julian Nagelsman, i shkarkuar nga Bajerni disa muaj më parë për arsye që kurrë nuk u bënë të qarta. Në krye të skuadrës për ndeshjen me Francën do të jetë Rudi Fëler, i emëruar trajner i përkohshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
