.png)
Gazeta Si – Gjermania të enjten përuroi dislokimin e saj të parë të përhershëm të trupave jashtë vendit që nga Lufta e Dytë Botërore.
Gjatë viteve të ardhshme, pak më pak se 5,000 ushtarë gjermanë do të zhvendosen në Lituani, me synimin për të kontribuar në mbrojtjen e vendit kundër kërcënimit rus.
Kjo është një pikë kthese e madhe për Gjermaninë: hera e fundit që vendosi trupa të përhershme jashtë vendit ishte gjatë regjimit nazist.
Që atëherë ajo nuk ka pasur më një kontigjent fiks jashtë kufijve të saj. Por kohët kanë ndryshuar dhe pak ditë më parë kancelari Friedrich Merz, në fjalimin e tij të parë madhor në parlamentin gjerman, tha se Gjermania ishte gati të ndërtonte “ushtrinë më të fortë konvencionale në Evropë”.
Për kontigjentin e saj në Lituani, Gjermania ka krijuar një brigadë të re, e cila i shtohet tetë të tjerave tashmë ekzistuese në ushtrinë gjermane.
Ajo do të quhet “Panzerbrigade 45”, ose Brigada Lituaneze dhe do të ketë si emblemë në njërën anë një luan të shfrenuar (i cili është simboli i divizionit më të madh të ushtrisë) dhe nga ana tjetër, Kulla Gediminas, e cila është një nga simbolet e Vilniusit.
Brigada do të bëhet plotësisht funksionale në vitin 2027 dhe do të bazohet në një bazë të re ushtarake në ndërtim në Rudninkai, 30 kilometra në juglindje të Vilnius.
Ajo zyrtarisht do të përbëhet nga 4,800 ushtarë dhe 200 anëtarë civilë, por duke qenë se do të jetë një dislokim i përhershëm, vlerësohet se edhe familjet e ushtarëve do të zhvendosen në Lituani, me një total prej 10,000 personash. Po ndërtohen edhe kopshte dhe shkolla, si dhe shërbime të ndryshme për jetën e përditshme.
Gjermania ka një prani ushtarake në Lituani që nga viti 2017: ajo kryeson një nga të ashtuquajturat “grupe beteje” shumëkombëshe me të cilat NATO ka organizuar mbrojtjen e vendeve të Evropës Lindore.
Në praktikë, që nga viti 2016/2017, NATO ka stacionuar kontigjente shumëkombëshe në tre vendet baltike (Estoni, Letoni, Lituani), Poloni, Sllovaki, Hungari, Rumani dhe Bullgari.
Secili prej këtyre kontingjenteve ka një vend që koordinon “grupin e betejës” dhe Gjermania kryeson atë të vendosur në Lituani.
Karakteristika e këtyre “grupeve luftarake” është se ato nuk janë të përhershme dhe se anëtarët dhe udhëheqja e tyre vazhdimisht qarkullon me rotacion.
Kjo është në përputhje me një marrëveshje të arritur në vitet 1990 midis NATO-s dhe Rusisë, e cila përcaktonte se NATO nuk do të vendoste trupa të përhershme në vendet ish-anëtare të Paktit të Varshavës, pra ato që dikur ishin në linjë me Bashkimin Sovjetik.
Por pushtimi rus i Ukrainës i ka ndryshuar gjërat dhe vendet e NATO-s që ndihen më të ekspozuara ndaj kërcënimit të Rusisë kanë filluar të kërkojnë të forcojnë mbrojtjen e tyre. Ndër këto janë vendet baltike, të cilat kufizohen drejtpërdrejt me Rusinë.
Megjithatë, nga pikëpamja juridike, krijimi i një kontingjenti të përhershëm gjerman në Lituani nuk bëhet në kuadrin e NATO-s, por në kuadër të një marrëveshjeje dypalëshe mes dy qeverive dhe me kërkesë të qartë të Lituanisë.
Aktualisht ka rreth 150 ushtarë gjermanë në Lituani, që pritet të rriten në 500 deri në fund të vitit, duke u rritur në pak më pak se 5,000 në 2027.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
