.png)
Gazeta Si – Të premten, Zyra Federale e Gjermanisë për Mbrojtjen e Kushtetutës, ose Bundesamt für Verfassungsschutz (BFV), shërbimi i brendshëm i inteligjencës së vendit, e përcaktoi partinë e ekstremit të djathtë Alternativa für Deutschland (AfD), si një organizatë ekstremiste që rrezikon demokracinë.
Shërbimi sekret përmendi pozicionet ksenofobike të AfD-së si arsye për vendimin, të cilin agjencia e konsideroi diskriminues ndaj segmenteve të tëra të popullsisë.
Në zgjedhjet e shkurtit, kishte marrë vendin e dytë si partia më e votuar, pas Unionit Demokristian të qendrës së djathtë (CDU) dhe para Social Demokratëve, dy partitë që do të formojnë qeverinë e re.
I njëjti vendim ishte marrë për disa seksione të partisë, duke përfshirë krahun e saj të të rinjve dhe ato të tre shteteve federale të Turingias, Saksonisë dhe Saksonisë-Anhalt.
Vlerësimi i BFV nuk përbën në vetvete një kërkesë apo urdhër për shpërndarjen e partisë, por parlamenti gjerman mund ta përdorë atë për ta kërkuar këtë.
Më pas kërkesa duhet të konfirmohet nga Gjykata Kushtetuese. Ka shumë pak gjasa që kjo të ndodhë realisht: për shembull, e njëjta kërkesë ishte refuzuar vazhdimisht nga Gjykata për shpërbërjen e një partie shumë më të vogël neonaziste.
Përcaktimi si një organizatë ekstremiste, ka të ngjarë të çojë në një zgjerim të kritereve që rregullojnë aftësinë e shërbimeve sekrete për të monitoruar aktivitetet e partisë, për shembull duke lejuar përgjimet e anëtarëve të saj ose përdorimin e informatorëve brenda saj.
Vlerësimi i BFV bazohet në një raport prej mbi një mijë faqesh, i cili aktualisht nuk është planifikuar për botim.
Sipas agjencisë, qëndrimet e shprehura nga partia dhe zyrtarët e saj, përfshirë edhe gjatë fushatës së fundit zgjedhore, tregojnë se AfD dëshiron të përjashtojë personat që kanë emigruar në Gjermani dhe pasardhësit e tyre nga pjesëmarrja e plotë në shoqëri, t’u japë atyre një status ligjor më të ulët se pjesa tjetër e popullsisë dhe t’i nënshtrojë ata ndaj diskriminimit që shkel normat kushtetuese.
Vitin e kaluar, pati demonstrata në shkallë të gjerë kundër partisë në shumë qytete gjermane, si reagim ndaj një investigimi gazetaresk që zbuloi një takim të fshehtë midis anëtarëve të AfD-së dhe lëvizjeve neo-naziste gjermane për të diskutuar një plan për dëbimet në shkallë të gjerë të azilkërkuesve, emigrantëve me leje qëndrimi dhe madje edhe shtetasve gjermanë me origjinë të huaj.
Mbështetja e partisë megjithatë është rritur ndjeshëm gjatë vitit të kaluar dhe disa sondazhe tani e tregojnë atë si partinë me më shumë preferenca në vend.
Një nga zëvendës zëdhënësit e AfD-së, Stephan Brandner, akuzoi shërbimet sekrete se kishin marrë udhëzime nga partitë tradicionale gjermane, pa ofruar prova për të mbështetur pretendimet e tyre.
Sipas Brandner, vendimi do të ishte një përpjekje nga partitë e qendrës së majtë dhe të qendrës së djathtë për të ruajtur pushtetin e tyre duke diskredituar AfD.
Të njëjtat qëndrime u përsëritën edhe nga anëtarë të tjerë të partisë. ministrja e Brendshme në largim, Nancy Faeser (SPD), nën ministrinë e së cilës varet BFV, e bëri të qartë se raporti ishte hartuar në mënyrë të paanshme pa ndonjë ndikim politik. Disa përfaqësues të partive të krahut të majtë dhe të qendrës së majtë e përshëndetën vendimin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
