Gazeta Si – Parlamenti i Gjeorgjisë ka rrëzuar të martën veton e presidentes së vendit, Salome Zurabishvili, ndaj të ashtuquajturit ligji për “agjentët e huaj”.
Ky vendim ka zemëruar protestuesit e mbledhur pranë ndërtesës së Parlamentit dhe do t’i rrezikojë vendit rrugën drejt Bashkimit Evropian.
Partia në pushtet, Ëndrra Gjeorgjiane, ashtu siç pritej, e përshpejtoi votimin për rrëzimin e vetos më 28 maj. Ajo, së bashku me partinë aleate, Partia Demokratike e Gjeorgjisë, kanë 84 deputetë nga 150 sa ka Parlamenti gjeorgjian.
Për ta zhvlerësuar veton e Zurabishvilit nevojitej një shumicë e thjeshtë prej 76 votash. Deputetët gjeorgjianë e morën këtë vendim megjithëse Bashkimi Evropian dhe disa vende anëtare i kërkuan atyre të mos e rrëzojnë veton për një ligj të cilit shpesh iu referohen si “ligji rus”, për shkak të ngjashmërisë me legjislacionin që Kremlini e ka në fuqi për t’i heshtur opozitën dhe lirinë e shprehjes.
Ligji i kthehet tani presidentes Zurabishvili për ta nënshkruar. Nëse ajo nuk pranon, atëherë kryetari i Parlamentit, Shalva Papuashvili nga partia në pushtet, mund ta nënshkruajë ligjin dhe ta publikojë.
Qindra protestues, kryesisht të rinj, u mblodhën paqësisht pranë hyrjes së pasme të Parlamentit, ku kishte prani të madhe të policisë. Ata brohoritën “Jo ligjit rus” dhe valëvitën flamuj gjeorgjianë dhe të BE-së.
Zurabishvili u tha protestuesve të mos i lejojnë 84 deputetët, që votuan për projektligjin, ta thonë fjalën e fundit.
“Tani ne duhet të bëjmë gjithçka që mundemi për t’u përgatitur për 26 tetorin, i cili do të jetë përgjigja jonë për sot. A jeni të zemëruar sot? Zemërohuni, por t’i përvishemi punës”, tha ajo, duke bërë thirrje për një fushatë për të mbledhur nënshkrime për një referendum.
Megjithatë, referendumi nuk është i mundur, për shkak se do të duhej të mbahej në gjithë territorin e Gjeorgjisë dhe aktualisht, 20 për qind e territorit të saj është i uzurpuar nga Rusia. Plebishiti do të ishte i mundur, por ai nuk është i detyrueshëm.
Ligji për “agjentët e huaj” është dënuar nga Shtetet e Bashkuara, si dhe nga Bashkimi Evropian, i cili ka thënë se ai “nuk është në përputhje” me përpjekjet e kamotshme të Gjeorgjisë për t’iu bashkuara bllokut.
Sipas ligjit, i cili nxiti protesta disajavore që u shtypën dhunshëm nga autoritetet, mediat dhe organizatat joqeveritare do të detyrohen të regjistrohen si “ndjekëse të interesave të një pushteti të huaj”, nëse më shumë se 20 për qind e të hyrave të tyre janë financim nga jashtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
