.png)
Tre armë zjarri dhe 1580 fishekë luftarakë janë gjetur nga policia kufitare në një automjet tip Land Rover në portin e Durrësit. Automjeti ishte ‘braktisur’ prej dhjetorit të vitit 2022 në sheshin e kontenierëve në port pasi dërguesi nuk ishte paraqitur për të kryer veprimet doganore.
Pasi Autoriteti i degës së Doganës në Durrës vendosi hapjen me datë 4 qershor, brenda automjetit u gjetën të fshehura në një hapësirë të përshtatur dy armë automatike, 1 pistoletë, 1580 fishekë luftarakë të kalibrave të ndryshëm dhe 12 krehra fishekësh për armë automatike dhe pistolete.
Sipas policisë, automjeti ka hyrë në Shqipëri nga Kosova përmes pikës kufitare të Morinës më datë 20 dhjetor të vitit 2022 dhe do të shkonte për në Republikën e Kongos në Afrikë. Në kërkim është shpallur një 24-vjeçar si i dyshuar që do të kryente trafikimin e armëve dhe municioneve drejt Kongos.
Armët e zjarrit do të dërgohen edhe në Institutin e Policisë Shkencore për t’ju nënshtruar ekzaminimeve teknike, balistike dhe daktiloskopike për të parë nëse janë përdorur në ndonjë ngjarje kriminale të mëparshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
