.png)
Gazeta Si – Gazetarja amerikane Shelly Kittleson, një eksperte e Lindjes së Mesme, e cila ka shkruar për disa media ndërkombëtare, duke përfshirë “Foreign Policy”, “Politico”, “Al Monitor” dhe botime italiane, si “Il Foglio” dhe “Ansa”, u rrëmbye të martën në Bagdad, kryeqytetin e Irakut.
Forcat irakiane nisën një operacion kërkimi pasi arrestuan njërin prej rrëmbyesve, ndërsa pjesa tjetër e grupit u arratis me një makinë së bashku me shtetasen amerikane.
Mediat irakiane njoftuan lirimin e saj, por aktualisht mungon konfirmim zyrtar. Sipas burimeve të CNN, besohet se gazetarja është në duart e një grupi terrorist paraushtarak të lidhur me Hezbollahun.
Kittleson ka shumë të ngjarë të jetë rrëmbyer nga Kataib Hezbollah, një milici shiite irakiane e mbështetur nga Irani që është përfshirë në mënyrë aktive në luftën e Lindjes së Mesme në javët e fundit, duke sulmuar objektiva në Irak të lidhura me Shtetet e Bashkuara dhe aleatët e saj.
Një video po qarkullon që duket se tregon momentin e rrëmbimit të Kittleson. Disa gazeta lokale raportuan se Kittleson u rrëmbye në rrugë, pranë hotelit ku ajo po qëndronte në Bagdad.
Ministria e Brendshme e Irakut tha se një i dyshuar në rrëmbim u arrestua pasi makina e tij u përmbys, ndërsa përpiqej t’i shpëtonte policisë.
Kittleson ishte në Irak duke mbuluar luftën dhe kishte marrë kërcënime nga Kataib Hezbollah ditët e fundit.
Ajo jeton në Romë, është 50 vjeçe dhe ka një karrierë të gjatë si gazetare e pavarur në zonat e luftës, veçanërisht në Lindjen e Mesme.
Disa vite më parë, ajo filloi të përqendrohej në Irak: e vizitoi vendin për herë të parë në vitin 2014 dhe është kthyer disa herë që atëherë.
Ajo gjithashtu ka punuar shpesh në Afganistan dhe ishte në vend pak para tërheqjes kaotike të SHBA-ve dhe kthimit të talebanëve në vitin 2021.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje