.png)
Nga Fatjon Rupi – Kualiteti, përgatitja e lartë fizike dhe mentale, impenjimi dhe përqendrimi janë elementë thelbësorë në futboll. Ka raste, sidomos për skuadrat e vogla, kur gjërat nuk ecin dhe këtu duhet edhe pak guxim për ndryshimin. Në të kundërt, do të mbetesh po brenda asaj guaske.
Kombëtarja shqiptare prej kohësh po përpiqet të bëjë kapërcimin e madh, sepse tani ka lojtarë me shumicë dhe mjaft cilësorë. Dhe me Silvinjon ka goditur në shenjë. Jo vetëm për energjinë pozitive që ai përcjell në ekip dhe që të gjithë e vlerësojnë, zgjedhjet taktiko-teknike, por edhe sepse ai është një trajner kurajoz. Nuk është një trajner skematik si Reja.
Me të paktën 4 lëvizje të guximshme trajneri brazilian arriti ta ndryshojë Kombëtaren, siç po tregojnë rezultatet dhe performanca e saj në fushë në këto eliminatore. Ato janë Mario Mitaj, Ylber Ramadani, Nedim Bajrami dhe sigurisht Jasir Asani.
Silvinjo vendosi të krijonte stabilitet në mbrojtje dhe për të zgjidhur problemin e krahut të majtë preferoi Mario Mitajn. Kurajoz aktivizimi i shkodranit titullar, ndoshta edhe pak i paragjykuar, por koha tregoi se trajneri ka vepruar drejt. Ai këmbënguli për një lojtar tipik roli, duke lënë mënjanë modifikimet.
Ylber Ramadani ishte një tjetër zgjedhje e goditur e trajnerit kuqezi. Silvinjo nuk pyeti për hierarkitë, apo emrat e skuadrave ku luajnë lojtarët. I besoi Ramadanit ‘çelsat’ e mesfushës para Bares, Gjasulës apo ndonjë tjetri. Besoi te muskujt dhe sakrifica e këtij lojtari, ndërkohë që e rriti shumë dhe taktikisht atë, duke e bërë një kolonë shumë të fortë të skuadrës.
Lëvizja e tretë është Nedim Bajrami titullar në një rreshtim, ku ky lojtar jep më të mirën. Më parë lojtari i Sasuolos ka luajtur më së shumti si zëvendësues dhe nuk ka mundur të tregojë vlerat e tij reale. Me Silvinjon është shfaqur jo vetëm si goleador, por si një 10-sh klasik, që vertikalizon dhe ekzekuton mjaft mirë çdo goditje standarde.
Lëvizja e katërt e Silvinjos, më e rëndësishmja dhe më e guximshmja, është ajo e Jasir Asanit. Trajneri jo vetëm e grumbulloi për herë të parë në Kombëtare, por e futi në formacion menjëherë. Pjesa tjetër pastaj dihet, gola spektakolarë dhe lojë rezultative e sulmuesit të djathtë. Asani është shumë i fortë në lojën një kundër një dhe Kombëtares i bën shumë punë, për të mos thënë është vendimtar.
Dhe të mendosh që më parë Jasir Asani nuk merrej fare në konsideratë. Duhej guximi i Silvinjos që ai të shpërthente me fanellën kuqezi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
