Qeveria italiane po përgatitet të marrë masa më të forta për të parandaluar infektimin nga Covid-i. Pritet të ketë norma dhe rregulla të reja edhe për eventet sportive, duke parë situatën me variantin Omicron.
Konkretisht, edhe në ‘zonat e bardha’ në stadiume do të rikthehet detyrimi për mbajtjen e maskës nga tifozët, por nuk do të ketë ulje të kapacitetit, që do të mbetet në masën 75%. Dekreti me normat e reja do të miratohet në mbledhjen e ardhshme të Këshillit të Ministrave.
“Jam e kënaqur për propozimin në lidhet me mbajtjen e detyruar të maskës në eventet sportive”, – ka thënë së fundi nënsekretarja e sportit, Valentina Vezzali, duke komentuar fjalët për norma të reja në stadiume, që do të parandalonin përhapjen e virusit.
“Në pritje të vendimeve nga Këshilli i Ministrave, – ka shtuar Vezzali, – kërkoj nga klubet sportive dhe organizatorët e eventeve të intensifikojnë kontrollet për të shmangur përhapjen e virusit dhe pasoja të tjera, që do të sillnin shtrëngimin e mëtejshëm të masave”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
