.png)
Një 33-vjeçar, i identifikuar si Endrit Sadedini është plagosur rëndë, pasi një sasi tritoli ka shpërthyer sapo ka hapur garazhin e tij për të marrë automjetin.
Ngjarja ka ndodhur në lagjen “10 korriku” të zonës së Lungomares jashtë ambienteve të një pallati rreth orës 15:10 të së dielës.
Si pasojë e shpërthimit të fortë, i riu ka mbetur i plagosur dhe është dërguar me urgjencë në spital. Një makinë e djegur është gjetur në Babicë, e cila dyshohet të jetë e autorëve të atentatit.
Sadedini i kishte shpëtuar një atentati në vitin 2017 kur i kishin vënë eksploziv në makinë. Në atë kohë ai e pikasi lëndën shpërthyese dhe njoftoi policinë.
Para 4 vjetësh, në pako kishte 500 gram lëndë eksploziv, të cilës i ishte montuar në mënyrë artizanale një celular për aktivizim në distancë.
Për këtë ngjarje u morën në pyetje 7 persona, ndërsa vetë Sadedini deklaroi në polici se nuk konflikte me njeri. Endrit Sadedini ka pasur në pronësi një lokal në Vlorë, ku në prill 2017 u vra një person dhe u plagosën tre të tjerë. Në këtë ngjarje mbeti i vrarë Ergys Gjinoveshi dhe policia arrestoi si autor të dyshuar 19-vjeçarin Gani Tozaj.
Hetimet e policisë janë përqendruar në të shkuarën e shënjestrës, pasi mësohet se po hetohet e kaluara e tij edhe jashtë vendit, ku ka jetuar për disa kohë.
Sipas informacioneve paraprake, i riu nuk ka qenë i dënuar, por ka disa precedentë të vegjël për shkak të përfshirjes në disa konflikte me persona të tjerë.
33-vjeçari është dërguar drejt Tiranës për një ndihmë të specializuar mjekësore, pasi ndodhet në gjendje të rëndë për jetën, ndërsa dyshohet se si pasojë e shpërthimit ka humbur të dyja këmbët.
Edhe në ngjarjen e të dielës, dyshohet se bëhet fjalë për një atentat për larje hesapesh, ndërsa policia ndodhet në vendngjarje dhe po punohet për zbardhjen e rrethanave të shpërthimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
