Zvogëlohet numri i të infektuarve nga Covid-19 në Europë, marrin frumë lirisht cirkuitet që janë gati të presin garat e F.1 javët e ardhshme: Franca, Austria dhe Holanda. Nëse në Paul Ricard synohet për të pasur 45 mijë spektatorë gjatë fundjavës (3 ditë), në Red Bull Ring pretendohen edhe 3 mijë persona më shumë, duke parë hapësirat e mëdha të Stirias.
Po punohet kështu për të shkuar deri në 40 mijë spektatorë në dy garat e 27 qershorit dhe 4 korrikut. Në Zandvort, – pas njoftimit të kryeministrit holandez Rute për zbutjen e masave nga 5 qershori, – synohet maskimumi i vendeve në shkallët e cirkuitit, pra 105 mijë spektatorë për garën e 5 shtatorit.
Në Austri objektivi është i arritshëm, siç konfirmojnë kancelari Sebastian Kurz dhe ministri i sportit, Verner Kogler. Ky i fundit për “Kleine Zeitung” ka shpjeguar se qeveria po mundohet të gjejë një zgjidhje për sa më shumë spektatorë.
Fjalëve të tyre u bashkohet edhe Helmut Marko, konsulenti i Red Bull-it, i cili për “Formel1.de” ka thënë: “Nuk kam dyshime se gjithçka do të shkojë natyrshëm, pas asaj që treguam në 2020-ën: do të bëjmë dy gara të sigurta, pavarësisht masave shtrënguese të ashpra. Kemi menduar për një skemë që redukton kontaktet dhe mund të presë më shumë tifozë”.
Për Çmimin e Madh të Holandës, plani për të shkuar në 105 mijë spektatorë është më konkret se kurrë. Një objektiv që ishte edhe sezonin e kaluar, kur Zandvort duhej të kthehej në kalendarin botëror pas një mungese prej vitit 1985. Ministri i Shëndetit publik, de Jonge, ka thënë se pritet eliminimi i masave për maskën dhe distancimin social prej 1 shtatorit.
Edhe drejtori sportiv i Çmimit të Madh të Holandës, Jan Lammers, është optimist. “Ka persona që kanë kaluar Covid-in dhe që janë vaksinuar, pastaj kemi parë që edhe në Koningsdag, gjatë festës kombëtare të 27 prillit, numrat nuk u përkeqësuan. Një shenjë e mirë dhe tendenca e muajve të fundit është pozitive. E duam këtë arritje”, – tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
