Gazeta Si – Flamurtari dhe Korabi kanë bërë një hap përpara drejt Superiores, duke fituar ndeshjet e para të Play-off-it. Këto dy skuadra kanë eliminuar përkatësisht Apoloninë dhe Tomorin dhe kanë dale në finale. Fituesja më pas ka edhe ‘finalen e madhe’ me vendin e 8-të të Superiores.
Një kualifikim disi non sens ai i Flamurtarit, që eliminoi Apoloninë me një barazim 1-1 në Vlorë. Sipas skemës së kampionatit të Kategorisë së Parë, Flamurtari kishte avantazhin e fushës, por favor më i madh për të paska qenë edhe barazimi. Duke qenë se kampionatin e rregullt vlonjatët e mbyllën më mirë se fierakët, në vend të 3-të, kanë kaluar më tej.
Apolonisë, nga sa është mësuar sot, i duhej patjetër të fitonte në Vlorë për të vazhduar rrugëtimin. Dhe i kishte mundësitë, sepse në minutën e fundit humbi një penallti. Penallti humbi edhe Flamurtari më parë. Golat në këtë ndeshje u shënuan nga Pedro Augusto për vlonjatët dhe Antoni për fierakët, të dy lojtarë të huaj.
Korabi ndërkohë ka arritur një kualifikim më emocionues, duke mundur Tomorin në Berat, me rezultatin 0-1. Albesn Keko realizoi golin e kualifikimit për dibranët, të cilët pas disa ditësh do të përballen me Flamurtarin.
Lushnja, një tjetër emër i njohur i futbollit shqiptar, aktualisht në nivelin inferior, sot siguroi qëndrimin në Kategorinë e Parë, pasi mundi 1-0 në ndeshje shtesë Valbonën, që vinte nga Kategoria e Dytë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
